За над 1.000 хектари се зголемија површините со пченица, а се очекува производство на лебното зрно да биде поголемо за околу 30.000 тони. Според оцените на Асоцијацијата на земјоделци на Македонија, со перманентно зголемување и на површините и на производството, реален е стремежот кон домашната пченица и да се намали влијанието од увозот, информира МИА.
Горан Томески, агроном од Агенцијата за поддршка на земјоделското производство, потврдува дека за 10-15 отсто се зголемени површините со пченица во Прилепско.
„Зголемени се површините, есенскиот род е во добра состојба и ако во мај и јуни се погодни временските услови, производството очекувано ќе се зголеми“, вели Томески.
Перо Стојкоски, претседател на Асоцијацијата на земјоделци на Македонија, оценува дека на ланското производство од околу 250.000 тони се очекува зголемен род. Голема улога има интервентниот фонд на Министерството за земјоделство.
„Во 2021 и 2022 година, според моите сознанија, во земјава имаше посеано 75.000 хектари со пченица. Оваа година имаме зголемување на површините под пченица за 1.000 хектари и очекуваме зголемено производство за 30.000 тони. Секако, освен земјоделските политики, ќе влијаат и временските услови. Интервентниот фонд на Министерството за земјоделство ги зголеми интересот и сигурноста на земјоделците за производството на лебното зрно“, вели Стојкоски.
Сѐ уште мора да увезуваме, но се стремиме кон сопствено производство. Неопходна е перманентната државна поддршка за рентабилност.
„Имаме капацитети за производство и можеме повеќе да произведуваме, ама без загуби. Тука е улогата на државата да нѐ поддржува. Ако имаме производство од околу 250.000 тони и годинава се произведат уште 30.000 тони, според бројот на хектари засеани со пченица, ќе биде потребно да покриеме уште 20 проценти од потребите. Но, во секој случај, состојбите со производството на пченица и на леб се уредуваат во договор со државата“, вели Стојкоски.
Откупувачите и земјоделците во амбарите чуваат околу 10.000 тони пченица, очекувајќи подобра цена, но сѐ зависи од берзите.
„Откупот на пченицата секогаш бил според берзанските цени. А во моментов берзанската цена на пченицата е од 16 до 17 денари. Тие што ја чуваат пченицата во амбарите го носат и ризикот“, вели Перо Стојкоски, претседател на Асоцијацијата на земјоделци на Македонија.
.webp){kind=icon}
