За 13 отсто се намалуваат цените на четири производи за хигиена

Владата на денешната седница ќе донесе одлука со која се утврдуваат највисоките цени во трговијата на мало на хигиенски производи, најави министерот за економија Крешник Бектеши.

Во согласност со одлуката се утврдуваат највисоките цени - на тоалетната хартија, влажните марамчиња, пелените за деца и возрасни и на хигиенските влошки - кои се применувале на 20 март во трговијата на мало, при што цените се намалуваат за 13 отсто.

„Оваа одлука се носи во согласност со анализите направени во Министерството за економија, имајќи ги предвид податоците од Царинската управа. Во делот на тоалетната хартија цените се движеле од 94,8 денари до 343,3 денари, од 1 март до 24 март 2023 година цената се движела од 94,8 денари до 205 денари, а со пресметано ДДВ од 11 денари до 241 денар, а 85 отсто од тоалетната хартија е од увоз. Кај влажните марамчиња цената се движи 94,6 денари во јануари, 94,5 денари во февруари и 83,2 денари во март 2023. Редовната царина е 6 отсто. За пелените за деца и возрасни цената се движи од 36 денари по парче до 1.600 денари по кутија, а за хигиенските влошки се движи од 27,9 денари до 63,56 денари по парче. Редовната царина е 6 отсто“ кажа министерот Бектеши.

Тој додаде дека одлуката за хигиенските влошки се носи пред сè бидејќи Законот за намалување на ДДВ на овие производи сè уште не е усвоен во Собранието. Oдлуката ќе стапи во сила по објавување во „Службен весник“, а ќе се применува од 1 април до 31 мај 2023 година.

Во врска со ставот на бизнисот дека замрзнувањето на цените не е пазарна мерка и, наместо тоа, подобро е да се интервенира преку стоковните резерви, Бектеши рече дека замрзнувањето на цените дава резултат и граѓаните може да го забележат тоа во секојдневното пазарење.

„Имам голема почит кон стопанските комори. Ако во државните резерви има хигиенски производи, овошје и зеленчук, тогаш ќе ги активираме, ама мислам дека треба да бидат подобро информирани кога излегуваат со вакви изјави, дека во стоковните резерви нема резерви на вакви производи. Пченица и брашно има, но тоа сега не е тема. Делот за замрзнување на цените на лебот, оризот, пченицата... дава резултати и граѓаните секој ден го чувствуваат тоа кога пазарат“, потенцира Бектеши.

Depositphotos

Тој исто така тврди дека нема да дојде до нагло поскапување на производите кога ќе престанат да важат владините одлуки за замрзнување на цените. 

„Нема таков ризик оваа година. Ги повикав сите производители и увозници, тие знаат кога поскапуваат суровините и кога е жетвата, да се подготват, зашто мерките може да продолжат и по 31 мај. Значи, нема никаков ризик од зголемување на цените, производителите и трговците може да направат калкулации во согласност со постојните цени на суровините и другите параметри во утврдувањето на финалната цена. Сите моментално се со маржа на профит и со цените утврдени од Владата“, истакна министерот одговарајќи на новинарски прашања.

Во моментов нема коментари за веста. Биди прв да коментира...

Остави коментар