.webp){kind=icon}
Радоста за изградбата на коридорот 8 не спласнува и обележува уште една македонска недела. Откако по потпишувањето на договорот со „Бехтел и Енка“ министрите од редот на ДУИ одиграа партија фудбал, сега цела владејачка коалиција отиде на свеченото отворање на таблата каде што ќе почнуваат автопатиштата од коридорот 8. Координаторот на проектот Артан Груби дури и се облече тематски, па на социјалните мрежи го споредија со Иниеста, Жерард и други фудбалски „осумки“.
Артан Груби, Профил на Фејсбук
Свеченостите се нижат, а „Бехтел и Енка“ допрва треба да почне да ги проектира патиштата, во меѓувреме компаниите, зависни од железницата, нижат загуби поради честите штрајкови на машиновозачите.
Друг настан што ја обележи неделава е замрзнувањето на цените на дел од овошјето и зеленчукот. Уште една од мерките на Владата за застанување на патот на високата инфлација, за која нашиот аналитички тим вели дека ја урива довербата на потрошувачите. А замирањето на инфлацијата го чекаат и берзите за да дојде до пресврт.
Блумберг
По случајот со „Кредит Суис“, нашите аналитичари проценуваат дека нема ризик за банките во регионот, но проверивме и дали е можно да дојде до формирање на првата регионална банка. Анализиравме и каква е состојбата во македонските банки и имаат ли тие штит од евентуално повлекување на големите штедачи. Нашиот аналитички тим ги анализираше и провизиите за безготовинските плаќа и смета дека конкуренција во овој сектор ќе влијае на нивното намалување.
Пишувавме и за тоа што е најголема закана за бизнисите во земјава, а според лидерите – тоа е недостигот од работна сила. Додека компаниите страдаат за работници, младите Македонци најмногу од сите во регионот работат на дигиталните платформи. Подобро заработуваат, но остануваат во сивата зона и државата нема бенефиција од нивните повисоки примања. Државата досега немаше бенефиција ниту од големите компании што нудат услуги во земјава, но со измените во законот за ДДВ треба да се смени тоа.
Ги анализиравме и финансиски ефекти на консултантите ангажирани главно од државата, а пишувавме и за криптоменувачниците во земјава - кои немаат лиценци, но се легални.
