.webp){kind=icon}
Додека власта и опозицијата во Македонија изминатава недела се препираа околу прашањето дали договорот со „Бехтел и Енка“ за изградба на патна инфраструктура по коридорот 8 предвидува да се ангажираат повеќе македонски работници или странци, од Хрватска стигна веста дека Македонците се четврти на списокот најмногубројни работници во Хрватска. Како тргнала работата, станува извесно дека поради хроничниот недостиг од квалификувани лица, пред сè во градежништвото, може да се случи во земјава да нема доволно работници што би работеле на новите патишта доколку не се увезе работна сила од странство.
Кога е во прашање инфраструктурата, за пет години возовите од Ниш до Љубљана ќе се движат со брзина од 200 километри на час. Србија, Хрватска и Словенија влегуваат во сериозна инвестициска активност за реконструкција на пругите по должината на паневропскиот коридор 10. Македонските граѓани и бизнисмени одамна сонуваат за подобрување на состојбата во железницата, чии возови едвај достигнуваат брзина од 50-60 километри на час. Предвидените проекти во железничката инфраструктура никако да се реализираат, а според надлежните клисурите покрај Вардар се пречка за брза пруга во земјава.
Аналитичкиот тим на „Блумберг Адрија“ неделава се фокусираше на франшизите за брза храна во регионот. Тие ги прецизираа придобивките од франшизите (за давателот и за примачот на франшизата), но и строгите правила на игра, кои доколку не се почитуваат, лесно можат да значат повлекување на франшизите. Македонија најдобро го почувствува тоа преку заминувањето на „Мекдоналдс“.
Во светот продолжи фасцинацијата од развојот на вештачката интелигенција и почна своевидна трка во користењето на новата технологија. Илон Маск јавно кажа дека сака да создаде ривал на ЧетГПТ (ChatGPT). Тој потврди дека планира да создаде „трета опција“, која ќе им конкурира на „Опен еј-ај“ (OpenAI), поддржана од „Мајкрософт“ (Microsoft Corp) и „Гугл“ (Google), и „Дип мајнд“ (DeepMind) на „Алфабет“ (Alphabet Inc). На тоа се надоврза и веста дека НАТО сака да склучи договор со Кина во врска со правилата за одговорна употреба на вештачката интелигенција и други технологии во воениот домен.
Тајванската компанија „Јагео“ официјално соопшти дека влегува во Македонија. Договорот за инвестицијата, вредна 205 милиони евра, која треба да отвори околу 4.000 нови вработувања, во Тајпеј го потпишаа директорот на Дирекцијата за технолошки индустриски развојни зони (ТИРЗ), Јован Деспотовски, и менаџментот на конзорциумот „Јагео“. Ќе им се исплати ли бизнисот на Тајванците ако се земе предвид дека во последниот период е двоцифрен растот на трошоците за труд по единица производ во Македонија е прашање што заслужува внимание, како и дилемата дали воопшто ќе има доволен број работници поради масовното иселување.
Државни обврзници за физички лица во изминатиов период беа понудени во Хрватска, Италија, Белгија и Шпанија со цел да се соберат пари од граѓаните за финансирање на јавната потрошувачка односно на буџетскиот дефицит. Откривме дека и во Македонија има своевиден бум на интересот меѓу граѓаните за купување државни хартии од вредност, а најдобар показател за тоа е што заклучно со март годинава физички лица поседувале државни записи во вредност од 138 милиони денари (2,2 милиони евра), што е рекорден раст во изминативе две години.
На оваа вест веројатно најмалку ѝ се израдуваа банките, кои конечно добија каква-таква конкуренција, што е очекувано ако се земе предвид дека каматите на банкарските депозити се неколкукратно пониски отколку каматите на државните хартии од вредност.
