.webp){kind=icon}
Во ТИРЗ Кичево следната година стартува инвестицијата на „Авеста батери енд енерџи инженеринг“ („Avesta Battery and Energy Engineering“ - ABEE), со изградба на фабрика за електрични батерии за автомобили.
Договорот за инвестицијата во вкупна вредност од 40 милиони евра, со која ќе бидат отворени 600 работни места, денеска во Брисел го потпишаа министерот за економија Крешник Бектеши и директорот на Дирекцијата на ТИРЗ, Јован Деспотовски, јави известувачот на МИА.
Прочитајте повеќе: Во ТИРЗ Кичево ќе се произведуваат батерии за електрични возила
Инвестицијата во првата фаза ќе изнесува 10 милиони евра, со вработување на 200 лица. Просечната бруто-плата ќе изнесува 1.500 евра. Плановите на инвеститорот се фабриката да биде оперативна во 2025 година.
Инвестицијата, посочи Деспотовски, има голема додадена вредност.
„Се очекува државната помош што ќе ѝ се даде на компанијата да се врати за четири-пет години само по основа на придонеси“, нагласи тој.
Како што соопшти министерот Бектеши, за инвестицијата е избрана општината Кичево затоа што во овој дел има висококвалификуван кадар од ТЕЦ Осломеј, кој ќе се трансформира во гасна централа.
Бектеши и Деспотовски се дел од делегацијата што во Брисел ја предводи претседателот на државата Стево Пендаровски, кој денеска заедно со нив ќе присуствува на бизнис-форум во Антверпен, каде што пред белгиските компании ќе бидат претставени можностите за инвестирање во Северна Македонија. Покрај овој, утре во Брисел ќе се одржи уште еден бизнис-форум.
