.webp){kind=icon}
Цените на недвижностите и каматните стапки се централните теми со кои ќе се занимаваме во текот на идната недела.
По вчерашната одлука на Европската централна банка за зголемување на референтната камата за нови 25 базични поени, каматата на депозитите стигна до највисокото ниво од 2001 година и сега изнесува 3,5 отсто. Истовремено, Федералните резерви на САД овој пат се одлучија да го паузираат зголемувањето на каматната стапка, но најавија барем уште две зголемувања до крајот на годината.
Затоа ќе анализираме - во кој правец ќе се движи македонската централна банка. Како банките одговорија на досегашните мерки на НБРМ, колку се зголемија каматите за кредитите и колку ќе изнесува казнената камата од следниот месец?
Ќе се обидеме да ве упатиме и од каде, во вакви услови на затегната монетарна политика, да соберете пари за вашите стартапи и мали бизниси.
Ќе напишеме и водич за криптопазарот во земјава. Преку него ќе дознаете каде можете да купите и да продадете криптовалути.
Цените на становите ќе ги анализираме од аспект на затегнатата монетарна политика. Дали повисоките камати ги одвраќаат граѓаните од земање станбени кредити? Зошто се намалува бројот на издадени одобренија за градба? Дали ова значи дека пазарот се засити и како ќе се одрази тоа на цените на квадратен метар до крајот на годината?
Ќе провериме и колку се задолжени граѓаните, постои ли опасност да биде преминат прагот и да се случат системски ризици на пазарот на недвижности.
Аналитичкиот тим на „Блумберг Адрија“ подготвува анализа за макроекономската стабилност во петте земји од регионот. Како помина првата половина од годината и какви се очекувањата за БДП, инфлацијата и невработеноста во втората половина од 2023 година ќе читате в понеделник.
