.webp){kind=icon}
Од 0,56 до 1,65 процент просечен надомест од прометот остварен со платежни картички наплаќале лани банките и другите обезбедувачи на платежни услуги од трговците и преостанатите субјекти што овозможуваат ваков вид наплата за производите и услугите. Статистиката на Народната банка открива дека банките имаат различни тарифи за различни дејности и дека висината на надоместот зависи и од големината на остварениот промет.
Убедливо најголема провизија од 2,88 проценти плаќале субјектите што се занимаваат со електронска трговија, а кои остваруваат годишен промет од милион до десет милиони денари (16.000-160.000 евра). Висока провизија од 2,78 проценти плаќале и онлајн трговците што остварувале промет до милион денари. Следни на листата по највисоки провизии за промет од платежни картички се државните институции со промет до милион денари (1,96 отсто) и субјектите што се занимаваат со игри на среќа со промет до милион денари (1,92 отсто).
Како се движат провизиите по години?
Податоците на Народната банка откриваат дека, и покрај растечката инфлација, барем во текот на минатата година нема зголемување на просечната висина на надоместоците што се наплаќале за промет од платежни картички.
Трендот на пораст на вкупниот број трансакции со платежни картички издадени од домашни издавачи на уредите лоцирани во земјата продолжи и во 2022 година и тие достигнаа 149,6 милиони трансакции. Притоа, користењето на платежните картички на физичките и виртуелните (интернет) места на продажба забележа висок годишен раст од 13,1 проценти.
На крајот на 2022 година е забележан годишен раст од 16,1 проценти кај вкупниот број трговци во земјата што прифаќаат плаќања со платежни картички (14.962), предизвикан пред сѐ од годишниот раст на бројот на трговците на виртуелните места на продажба за 19 проценти (1.603), како и од годишниот раст на бројот на трговците што прифаќаат плаќања со картички на физичките места на продажба за 15,8 проценти (13.359).
„Мастеркард“ не планира зголемување на провизиите, од „Виза“ молчат
„Волстрит журнал“ неодамна објави дека „Виза“ (Visa Inc.) и „Мастеркард“ (Mastercard Inc.) планираат да ги зголемат надоместоците што многу трговци на мало ги плаќаат кога прифаќаат кредитни и дебитни картички на клиентите. Потоа „Блумберг“ објави дека, според документ што му бил на увид, дополнителните трошоци за „Виза“ е планирано да започнат во октомври за онлајн трансакции, по што во април следуваат нови надоместоци за комерцијални кредитни, дебитни и припејд-картички. Исто така беше објавено дека „Матсеркард“ (Mastercard) планира нова претплата за предовластување за купување со кредитна картичка што би започнало во октомври.
Овие вести предизвикаа бура реакции кај американската, но и светската јавност, со оглед на тоа што станува збор за два бренда што се меѓу најголемите на глобалниот пазар. Овие платежни картички доминираат и на македонскиот пазар. Имено, на крајот на минатата година во земјава се користеле 2.125.400 платежни картички. Од нив, 1.145.211 биле „виза“, а 927.370 биле „мастеркард“.
Поради тоа, „Блумберг Адрија“ ги праша „Мастеркард“ и „Виза“ дали планираат зголемување на провизиите во Македонија.
Од „Мастеркард“ демантираа дека има зголемување на надоместоците или дека планираат таков потег во иднина.
Од „Виза“ не одговорија на нашите прашања до објавувањето на приказната.
