Хрватска и Словенија ветени земји за македонските работници

Македонските работници се позиционираат високо на листите по бројот на работни дозволи за странци на хрватскиот и словенечкиот пазар на трудот. Овие две земји од година на година стануваат сè поатрактивни за работа во странство.

Претходната година Хрватска издала 13.400 работни дозволи за граѓани од Македонија. На листата за работни дозволи доминираат работниците од Босна и Херцеговина со 28.000 работни дозволи, па од Србија со 24.000, а потоа следуваат две малку поегзотични земји, Непал и Индија. На петтото место се Македонците.

Од 2016 година до крајот на 2023 година во Хрватска биле издадени повеќе од 96.000 работни дозволи, од кои 8.000 биле за лица од земји членки на ЕУ, а преостанатите за лица од трети земји. По дејност, најмногу дозволи се издадени во градежништвото (44 отсто), туризмот (25 отсто), транспортот (6 отсто) и во трговијата (3 отсто), додека на сите други дејности отпаѓаат 9 отсто.

Хрватска го смени Законот за странци

Битката за работници се води речиси во сите земји. За да добие повеќе странска работна сила, Хрватска го смени Законот за странци, при што го укина системот на квоти и го забрза издавањето работни дозволи.

Главните измени на законот се продолжување на рокот за издавање дозвола за работа и престој од една на најмногу три години, сезонската дозвола да важи девет наместо шест месеци и да биде дозволена промена на професијата со истиот работодавец или промена на работодавецот. Наедно, рокот за издавање сина карта се продолжува од две на четири години (им се издава на висококвалификувани граѓани од трети земји).

Во Словенија странците сочинуваат 14 отсто од работната сила

Минатата година се издадени 17.252 работни дозволи за странци што сакаат да работат кај словенечки работодавци, а кои не доаѓаат од ЕУ, или за петтина помалку од претходната година. Од 17.000 работни дозволи, 13.400 добиле граѓани на БиХ, кои се убедливо на првото место. Србија е следна по бројот на издадени работни дозволи, со 3.829 дозволи издадени на нејзини граѓани минатата година. За македонски граѓани претходната година биле издадени 16 работни дозволи. Според издадените работни дозволи, најголем број странци во моментов работат во производство, а потоа следуваат градежништво, транспорт и складирање.

Според образовната структура, огромното мнозинство работници имаат основно или ниско средно стручно образование. На словенечките работодавци очајно им е потребна висококвалификувана работна сила, особено во ИТ-индустријата. Во 2022 година се шпекулирало дека барањата за добивање дозволи за висококвалификувани работници би можеле да се разгледуваат по приоритетна основа. На крајот, владата очигледно го ставила овој предлог во фиока.

Кариерните настани што се случија во Македонија ќе се одржат и во Црна Гора

Со цел што е можно поуспешно да се најде странска работна сила во регионот, Заводот за вработување и работодавците минатата година одржаа неколку кариерни настани во БиХ и во Македонија, кои, како што објавивме, беа многу посетени, а имаше и голем интерес за работа во Словенија. 

Поради големата побарувачка од работодавците и потребите на словенечкиот пазар на трудот, оттаму одлучиле за првпат да одржат настани во Северна Македонија, велат од Заводот. На пример, работниците од  Македонија беа поканети со слоганот „Придружете ни се и бидете дел од обновата на земјата по поплавите“. Годинава слични настани за вработување ќе се одржат и во Црна Гора.