Искористување на оперативниот, производствен и управувачки персонал и поефикасно и економски поисплатливо искористување на производствениот капацитет на АД ТЕЦ „Неготино“ се главните причини што ги посочува државната компанија АД ЕСМ за присоединувањето на АД ТЕЦ „Неготино“ кон ЕСМ, по направената анализа за оправданоста од присоединувањето.
„Енергетската криза од 2021 година претставува пресуден аргумент за нужноста од интегрирањето на АД ТЕЦ ’Неготино’ во рамките на АД ЕСМ Скопје, како од аспект на диверзификација на ризик, така и од аспект на стабилност и континуитет во производството на електрична енергија на државно ниво. Исто така треба да се има предвид дека двете компании се лиценцирани за производство на електрична енергија, па ваквиот предлог за статусна промена присоединување е целосно оправдан и реализиран“, се наведува во соопштението на АД ЕСМ.
МИА
Кога започна енергетската криза, Владата му даде согласност на АД ЕСМ да го активира со работа ТЕЦ „Неготино“ за привремено дополнително производство на електрична енергија во услови на енергетска криза и, заклучно со 2022 година, беа произведени 412.692 MWh електрична енергија.
„Произведената електрична енергија во ТЕЦ ’Неготино’ за време на енергетската криза, АД ЕСМ ја искористи во еден дел за потребите за снабдување на домаќинствата и малите потрошувачи во случаи на кусоци, дел за потребите на АД МЕПСО, а дел ја понуди на продажба на слободен пазар на домашните стопански субјекти, по цени пониски од цените на берзата“, се наведува во соопштението.
Термоцентралата „Неготино“ почнала да се гради во 1974 година, а била завршена во 1978 година. Последен пат претходно работела во производството на електрична енергија во 2009 година, за во 2022 година, по 13 години пауза како „ладна резерва“, во услови на енергетска криза да биде вклучена за само 40 дена. ТЕЦ „Неготино“ има вкупен расположлив капацитет за производство од 180 мегавати, што е приближно еден блок на РЕК Битола.
.webp){kind=icon}
