АД „Електрани на Северна Македонија“ соопшти дека ТЕЦ Неготино од изутринава почнува со активности за ставање на електроцентралата во функција на производство. Како што посочија од компанијата, во договорот со економскиот оператор што ги изведувал работите бил наведен 15 декември како датум за завршување на зафатите.
„Но со засилен интензитет на работа на економскиот оператор и зголемен ангажман на вработените, што во изминатите денови се вршеше под засилен надзор, рокот е скратен за десет дена. Во услови на енергетска криза, тоа ќе значи економска и енергетска бенефиција“, наведоа од „Електрани на РСМ“.
Во сервисните и ремонтните активности беа вклучени економскиот оператор „Монтинг инженеринг“, вработените во ТЕЦ Неготино, АД ЕСМ, РЕК Битола и консултанти од производителот од Украина.
Генераторот е произведен во 1975 година и во ТЕЦ Неготино е ставен во употреба во 1978 година. Ова е прво отворање и големо ремонтирање на генераторот.
Од АД ЕСМ посочија дека вложуваат максимални напори и засилено ги ставаат во функција сите капацитети, за да се задоволи зголемената потреба од домашна електрична енергија, со оглед на зголемените задолжувања од страна на Владата кон АД ЕСМ за испорака на енергија кон Универзалниот снабдувач, институциите, како и бизнис-секторот.
Токму ТЕЦ Неготино е еден од негативните примери во делот на аерозагадувањето, за кој алармираа невладините организации во изминатиот период. Тие велат дека енергетската криза во никој случај не смее да биде оправдување за труење на граѓаните. ТЕЦ Неготино, која десетина години беше ладна резерва, сега е активна електроцентрала.
„Последиците од ова најмногу се гледаат по аерозагадувањето. Но и пораката што ја испраќаат е погрешна, дека сè е дозволено сè додека ни обезбедува топлина и струја. Тоа значи дека и луѓето ќе пристапат кон поевтини методи на загревање и нема да користат дрво, туку ќе користат отпад. И доколку зимава е ладна, ќе имаме загадување повисоко од претходните години. Последиците по јавното здравје ќе бидат огромни. А веќе се огромни, бидејќи со години ние сме меѓу топ 3 најзагадени земји во Европа. Според анализите од Европската агенција за животна средина, има 3.000-4.000 предвремени смртни случаи само од аерозагадување“, вели Давор Пехчевски, програмски координатор за енергија во „Екосвест“.
Блумберг Адрија веќе пишуваше за тоа дека од „Екосвест“ алармираат дека загадувањето не е само преку воздухот туку и преку почвата и водата.
.webp){kind=icon}