Во Македонија на крајот од 2023 година работеле дури 103 радиодифузери, од кои 40 телевизии и 63 радија, што со оглед на популацијата и големината на територијата на земјава очигледно е премногу кога станува збор за поделбата на рекламниот колач и на публиката. Имено, во Македонија има само пет приватни телевизии и четири приватни радија на државно ниво, а повеќето се помали регионални и локални субјекти за кои повеќето македонски граѓани никогаш не слушнале.
Според податоците на Агенцијата за аудио и аудиовизуелни медиумски услуги (ААВМУ), лани јавниот радиодифузен сервис и комерцијалните радиодифузери заедно оствариле приходи во износ од 2,45 милиjaрди денари (39,9 милиони евра), од кои околу милијарда денари (16,2 милиони евра) се приходи на Македонската радио-телевизија, 1,27 милијарда денари (20 милиони евра) се приходи на телевизиите и 185,5 милиони денари (околу три милиони евра) приходи на радиостаниците.
„МРТ има пад на вкупните приходи во однос на 2022 година за 9 проценти, додека приходите на комерцијалните телевизии и на комерцијалните радиостаници пораснале за 3 проценти, односно за 8 проценти“, наведуваат од ААВМУ.
Половина од вкупните приходи во индустријата биле остварени од рекламирање (50,28 проценти), а 39,47 проценти се средства од државниот буџет префрлени на сметката на Македонската радио-телевизија. Другите 10,25 проценти од вкупните приходи биле остварени по други основи. Oд вкупно 40 комерцијални телевизии, повисоки приходи отколку во претходната година оствариле 21 (три на државно ниво, седум регионални и 11 локални телевизии), а од вкупно 58 радиостаници, повисоки приходи оствариле 37 (четирите радиостаници на државно ниво, шест регионални и 27 локални радиостаници).
На ниво на радиодифузна индустрија вкупниот биланс покажува дека добивка во 2023 година оствариле заедно само комерцијалните радија, и тоа износ од 10,15 милиони денари (165.000 евра). Македонската радио-телевизија покажала загуба од 131,77 милион денари (2,1 милиони евра), а комерцијалните телевизии заедно искажале загуба од 139,55 милиони денари (2,2 милиони евра).
„Овој финансиски резултат што го оствариле комерцијалните телевизии е најлош во периодот од 2018 година досега. Загубата на целата индустрија во однос на претходната година е за три и пол пати поголема“, посочуваат од ААВМУ.
Колку вработени има во радиодифузерите?
Просечниот број на вработени во редовен работен однос изнесувал 1.774 лица. Од нив, 661 лице работеле во јавниот сервис (20 лица помалку отколку во 2022 година), 924 лица во телевизиите (16 лица помалку отколку во 2022 година) и 189 во радиостаниците (19 лица повеќе отколку во 2022 година).
Кој е кој меѓу приватните телевизии на државно ниво?
Во 2023 година терестријалните телевизии на државно ниво ТВ Алфа, ТВ Алсат-М, ТВ Канал 5, ТВ Сител и ТВ Телма заеднички оствариле вкупни приходи во износ од 1,1 милијарда денари (17,9 милиони евра). Највисоки вкупни приходи од 474 милиони денари остварила ТВ Сител (7,7 милиони евра). Најниски се приходите на ТВ Телма, во износ од 115,02 милиони денари (1,8 милион евра). Телма е единствената телевизија што потрошила повеќе средства отколку што остварила приходи.
„Заедничките вкупни приходи на овие пет телевизии се за 4,46 проценти повисоки отколку во претходната година, но тоа се должи на зголемувањето на приходите само на две телевизии - ТВ Сител за 14,59 проценти и ТВ Алфа за 13,93 проценти. Преостанатите три телевизии оствариле помалку приходи отколку во претходната година, и тоа ТВ Алсат-М за 2,01 проценти, ТВ Канал 5 за 9,77 проценти и ТВ Телма за 2,73 проценти“, посочуваат од ААВМУ.
Дури 86,30 проценти од вкупните приходи овие телевизии ги оствариле од продажба на времето за рекламирање. Учеството на приходите од рекламирање во вкупните приходи на секоја телевизија поединечно е највисоко кај ТВ Сител (98,07 проценти). ТВ Канал 5 од рекламирање остварила 93,73 проценти, ТВ Телма 90,47 проценти и ТВ Алсат-M 87,31 проценти од приходите. Забележително пониско е учеството на овој вид приходи во вкупните приходи на ТВ Алфа, која од продажба на времето за рекламирање остварила само 30,17 проценти од вкупните приходи. Од ААВМУ нагласуваат дека за оваа телевизија најзначаен извор на приходи лани биле приходите од продажба на содржини.
Вкупните приходи од рекламирање што заеднички ги оствариле овие пет телевизии изнесуваат 955,29 милиони денари (15,5 милиони евра).
„Тоа е за 4,71 отсто повеќе отколку во претходната година, но сè уште помалку отколку во претпандемиската 2019 година. Зголемувањето на заедничките приходи од реклами во однос на претходната година се должи на повисоките приходи што ги оствариле ТВ Сител (за 15,50 проценти) и ТВ Алфа (за 14,57 проценти). Преостанатите три телевизии оствариле помалку приходи од реклами отколку во 2022 година, и тоа ТВ Алсат-М за 1,03 процент, ТВ Канал 5 за 10,12 проценти, а ТВ Телма за 0,28 проценти“, наведуваат од ААВМУ.
Радијата уриваат рекорди
Четирите радиостаници што емитуваат програма на државно ниво лани заедно оствариле приходи од 86,50 милиони денари (1,4 милион евра), од кои половина биле приходите на Канал 77, во износ од 44,12 милиони денари (717.000 евра). Антена 5 успеала да оствари 29,64 милиони денари (481.000 евра), Метрополис 9,27 милиони денари (150.000 евра) , а Јон 3,47 милиони денари (56.000 евра).
„Вкупните приходи на сите четири радија се за 21 процент повисоки во споредба со оние што се остварени во 2022 година, а наедно се и највисоки во последните шест години. Приходите се зголемиле кај сите радиостаници. Средствата што во 2023 година ги остварила секоја радиостаница се највисоки во периодот од 2018 година досега“, прецизираат од ААВМУ.
.webp){kind=icon}
