Народна банка: Годишен раст на „зелените кредити“ од 15 проценти

Продолжува растот на зелените кредити во портфолијата на банките и во вториот квартал од 2024 година, соопшти Народната банка. Според податоците на централната банка, во вториот квартал од 2024 година растот на „зелените кредити“ изнесува 2,6 милијарди денари (42,2 милиони евра) или 2,8 проценти, додека на годишна основа растот на овие кредити забави и изнесува 14,9 проценти.

„Во споредба со крајот на 2019 година, кога започна прибирањето и објавувањето на овие податоци, „зелените кредити“ се зголемени за 2,8 пати“, наведуваат од Народната банка.

Оттаму објаснуваат дека „зелените кредити“ се заеми наменети за проекти коишто поддржуваат одржливи, еколошки цели, или цели коишто придонесуваат за зелената транзиција во општеството, како што се инвестиции во нова еколошка технологија.

Според податоците на Народната банка, на крајот од второто тримесечје од 2024 година, состојбата на „зелените кредити“ во билансите на банките изнесува 20,4 милијарди денари (332 милиони евра). За споредба, на крајот на 2019 година тие изнесувале 7,1 милијарди денари (116 милиони евра). Заклучно со второто тримесечје од 2024 година, состојбата на кредитите одобрени на компаниите изнесува 19,4 милијарди денари (315 милиони евра), додека на домаќинствата изнесува околу милијарда денари(16,5 милиони евра).

Расте и уделот на „зелените“ во вкупните кредити, иако сѐ уште е на релативно ниско ниво. Oд крајот на 2019 година, заклучно со второто тримесечје од 2024 година, учеството на „зелените“ во вкупните кредити е зголемено од 2,2 на 4,5 проценти, колку што изнесува во последните три квартали.

„Народната банка, препознавајќи ги ризиците од климатските промени на долг рок, зазеде проактивен став и како една од своите стратегиски цели ја постави зголемената свесност за климатските промени и придонесот кон „зелената“, одржлива економија. Преку низа активности, нашата централна банка придонесува за поттикнување на „зеленото финансирање“, вклучувајќи ги и монетарните мерки“, соопшти централната банка.

 

Во моментов нема коментари за веста. Биди прв да коментира...

Остави коментар