Владата ја објави листата на прехранбени производи од таканаречената есенска кошница за кои бруто профитната маржа привремено ќе биде ограничена на 10 проценти во трговијата на големо и мало. Станува збор за 73 производи коишто во маркетите ќе бидат обележани со натписот „помалку трошоци, повеќе за тебе“. Одлуката на Владата за ограничување на бруто профитната маржа на дел од основните прехранбени производи ќе стапи на сила по објавувањето во Службен весник, а ќе се применува до 31 октомври годинава.
Министерот за економија Бесар Дурмиши на прес-конференција рече дека со стапување во сила на оваа одлука се очекува трошоците за храна и безалкохолни пијалоци да се намалат во просек за околу десет проценти. Дурмиши соопшти дека ваквата одлука е донесена врз основа на податоците од Државниот завод за статистика за индексот на трошоци за живот, кои покажуваат дека во август 2024 година евидентирано е зголемување на трошоците за храна за четири проценти во однос на декември минатата година, од кои најголемо зголемување има кај овошјето од 10,9 проценти, кај млекото, сирењето и јајцата од 6,6 проценти, кај зеленчукот од 3,9 проценти, кај месото од 3,6 проценти и кај лебот и жита од два процента. За истиот период, трошоците за безалкохолни пијалоци се зголемени за 9,4 проценти.
„Согласно податоците, во консултација со работната група која беше формирана од претставници од министерствата за економија и труд, за финансии и за земјоделство, сметаме дека ваквото зголемување на трошоците за храна и безалкохолни пијалоци е прекумерно и несразмерно во однос на растот на трошоците за набавка и оперативните трошоци кои трговците ги имаат“, рече Дурмиши.
Прочитај повеќе
Владата подготвува есенска кошничка со замрзнати цени
Кошничката ќе содржи стотина производи со намалени цени.
11.09.2024
Според одлуката, производите кои се вклучени во есенската кошница и се поставени на полиците, фрижидерите и разладните уреди, треба јасно да се обележат со натписот „помалку трошоци, повеќе за тебе“. Оваа мерка во наредниот период ќе се применува како божиќна кошница, рамазанска кошница, велигденска кошница со ограничено време на траење пред и за време на празниците кога вообичаено се зголемуваат цените на основните прехранбени производи, со цел да се заштити стандардот на граѓаните.
.webp){kind=icon}