Се крчка иницијатива Регулаторната комисија да ја утврдува и цената на водата

Претпријатијата тонат во долгови, а водата ја снемува. Состојбата се влошува од година во година. Единственото решение е Регулаторната комисија за енергетика и водни услуги да ја утврдува конечната цена, не само за струјата, туку и за водата.

За ова решение постои согласност и кај јавните претпријатија кои стопанисуваат со водата во земјава и кај Регулаторната комисија. Иницијативата наскоро ќе биде ставена на хартија и ќе може да почне постапката за измена на законите.

„Потребна е само политичка волја. Треба да се сменат два закони. Едниот е Законот за утврдување на цени на водни услуги, а другиот е Законот за локална самоуправа кој е системски закони и кој се менува со двотретинско мнозинство“, вели во изјава за „Блумберг Адрија“ претседателот на Регулаторната комисија, Марко Бислимоски.

Целта на иницијативата е одлуката за цената на водата, која според сегашната регулатива ја утврдуваат општинските совети, да не биде политичко туку економско прашање што ќе доведе до помали загуби и подобра финансиска ситуација на претпријатијата.

Лани биле изгубени две третини од произведената вода

Според годишниот извештај на РКЕ за 2024 година, околу 64 отсто од водата во земјава е изгубена, а загубите постојано растат.

„Главната причина за големите загуби на вода е дотраената инфраструктура. Претпријатијата во моментов немаат пари за инвестициски проекти и тоа е главната причина што загубите растат. Регулаторната комисија за енергетика во тригодишниот план наведе како цел загубите да се намалуваат по еден процент секоја година, но тешко е тоа да се оствари“, вели Бислимоски.

Тешко е затоа што цената на водата е политичко прашање. Согласно сегашната регулатива, претпријатијата бараат од РКЕ опсег за водните тарифи. РКЕ определува највисока и најниска тарифа, но конечната одлука ја носат советите на локалните самоуправи. Поскапувањето на водата не е добра вест за гласачите, па најчесто советите или воопшто не ги земаат предвид одлуките на РКЕ или ги гласаат најниските тарифи.

На пример, ЈП Водовод и канализација Скопје лани не ја промени цената на водата. Иако Управниот одбор побарал, Советот на градот Скопје не ја изгласал одлуката.

Загубите на вода во скопскиот регион се во рамките на државниот просек. Највисоки загуби на вода има во југозападниот регион, дури 74,69 отсто

Водоводните претпријатија тонат во долгови

Според податоците на Министерството за финансии за првиот квартал од оваа година, достасаните а ненаплатени побарувања на општинските јавни претпријатија изнесуваат 111, 4 милиони евра.

Во групата 50 најголеми должници пак, пет се водоводни претпријатија. Меѓу нив, најголем должник е скопски Водовод, а во првата петорка се и две претпријатија од југозападниот регион каде загубите се најголеми – Охрид и Струга.

Како растат загубите, така расте и потрошувачката

Просечната потрошувачка на вода на македонските домаќинства лани изнесувала 12,92 метри кубни месечно. Во 2023 година просечната потрошувачка изнесувала 12,25 метри кубни.

Најголем раст на потрошувачката на вода лани имало во полошкиот регион, а најмала потрошувачка има во југозападниот регион.

Во моментов нема коментари за веста. Биди прв да коментира...

Остави коментар