Индустриските производи поскапеле за 18 отсто на годишно ниво

За една година индустриските производи поскапеле за 18 отсто, а на странските пазари за 14,4 проценти. Државниот завод за статистика (ДЗС) ги објави податоците за движењето на продажните цени на производителите на индустриски производи.

Според ДЗС, во јули, споредено со истиот месец лани, во земјава најмногу поскапеле цените во секторот снабдување со електрична енергија, гас, пареа и климатизација, за дури 49 проценти. Цените во секторот рударство и вадење камен се зголемиле за 8,9 отсто, додека во преработувачката индустрија поскапувањето е 16,7 проценти.

При тоа, најмногу се покачиле цените на фабрикувани метални производи за 59,8 проценти, следуваат компјутерски, електронски и оптички производи, со раст на цените од 33,1 отсто, поскапувањето кај производите од хартија е 29,7 проценти, кај производството на облека 24,1 отсто, а прехранбените производи се покачиле за 22 проценти.

Продажните цени на производителите на индустриски производи на странските пазари се со помал раст од претходно споменатите.

Податоците од Статистика покажуваат дека поскапувањето во преработувачката индустрија е 14,7 отсто на годишно ниво, а кај секторот рударство и вадење камен растот е 11 отсто.

И тука најмногу поскапеле фабрикувани метални производи за 40,7 проценти, следуваат компјутерските, електронски и оптички производи со раст на цени од 33,1 отсто, прехранбените производи поскапеле за 24,4 проценти, облеката 24,8 отсто, а производите од хартија за 26 отсто.

На месечно ниво, продажните цени на производителите на индустрикси производи се зголемиле за 0,4 отсто, додека на странските пазари во јули споредено со претходниот месец, јуни, се намалиле за 1,5 отсто.

Во моментов нема коментари за веста. Биди прв да коментира...

Остави коментар