.webp){kind=icon}
Индустриското производство во земјава со годишен пад од 5 проценти. Податоците од Државниот завод за статистика покажуваат дека во месец јули годинава индустријата работи со намалена активност, а опаднал и бројот на работници споредено со истиот месец лани.
Производството во одредени сектори на годишно ниво е речиси преполовено. Таква е состојбата во секторот за хемикалии и хемисли производи, каде падот е дури 40,4 проценти, производството на метали е намалено за 40,1 отсто, а активностите за поправка и инсталирање на машини и опрема се намалени за 37,9 проценти.
Кај преработувачката индустрија падот е 5,6 отсто. Интересно е што во услови на инфлација и растечки малопродажни цени, особено на основните производи за исхрана, Статистика регистрираше пад на производството токму кај прехранбените производи за 8,3 проценти. Намалено е и снабдувањето со електрична енергија и гас за 12,2 отсто.
Меѓу индустриите со раст на производството на годишно ниво најдобри се податоците за кожната индустрија, која бележи раст од 48,1 отсто. Позначајно зголемување на производството има кај фармацевтската индустрија од 25,1 отсто, дрвната индустрија 21,4 отсто, компјутерски производи 20,2 проценти, текстилната индустрија во јули имала за 13,1 отсто повеќе работа од истиот месец лани, а зголемено е и производството на други машини и опрема за 31,4 проценти.
Покрај генералниот пад на производството, опаѓа и бројот на вработени во индустријата. За една година индустријата има 0,6 отсто помалку работници, додека ако се земе предвид периодот јануари-јули годинава со истиот период лани, тогаш бројот на работници бележи пад од 1,7 проценти.
Најголем процент работници останале без работа во производството на облека, за 6,7 проценти, во текстилната индустрија се намалени за 4,4 отсто, а во кожната индустрија има 10,4 отсто помалку работници за една година. Без работа останале и 5,5 отсто од вработените во секторот енергијата, како и 11,1 отсто од работниците кои инсталирале и поправале машини и опрема. Помал пад на бројот на вработени има и во други сектори.
Сепак, значајно е да се споменат и секторите кои вработувале, иако се помалубројни од тие кои отпуштале. Најголем раст на вработените има во хемиската индустрија за 15 отсто, во фармацијата има 7,9 отсто повеќе работници, во производство на моторни возила зголемувањето на работници е 6 проценти, а во производство на електрична опрема 4,7 отсто.
Интересна е состојбата во индустријата за вадење јаглен и лигнит, каде производството е зголемено за дури 43,8 проценти, а бројот на работници се намалил за 5,9 отсто. Обратна е ситуацијата во тутунската индустрија, каде има дури 40 проценти повеќе работници, а обемот на производство е намален за дури 12,6 проценти.
