Работодавачите во САД продолжија со добро темпо на вработување минатиот месец, а стапката на невработеност неочекувано се врати на историски најниско ниво, што укажува на стабилен пазар на работна сила. Тоа ги насочува американските Федерални резерви (ФЕД) да се фокусираат на уште едно големо зголемување на каматните стапки.
Според извештајот на Министерството за труд, работните места во САД, не сметајќи ги земјоделците во оваа статистика, се зголемиле за 263.000 во септември, што е помалку од август кога беа вработени нови 315.000 лица.
Стапката на невработеност неочекувано падна на 3,5 отсто, што е најниско ниво во последните пет децении, а просечната плата за работен час порасна.
Прочитај повеќе
Невработеноста во Словенија е најниска од осамостојувањето
Во септември Словенија постигна нов рекорд, од околу 2 милиони жители, нешто над 52.000 се без работа
05.10.2022
Bloomberg Mercury
Просечните очекувања на анкетираните економисти од страна на Блумберг беа дека работните места ќе се зголемат за 255.000, а стапката на невработеност ќе се задржи на 3,7 проценти.
Бројките се најнов показател за повеќегодишната сила на американскиот пазар на труд. Иако постојат некои показатели, кои укажуваат на тоа дека побарувачката за работна сила се намалува, сепак вработувањето продолжува со добро темпо. Тоа не само што ја поттикнува потрошувачката, туку исто така го поттикнува и растот на платите бидејќи компаниите се натпреваруваат за ограничената понуда на работници.
Во меѓувреме, банкарите од ФЕД се надеваат дека ќе видат значајно омекнување на условите на пазарот на работна сила, со цел заладување на растот на платите, а преку тоа и на инфлацијата. Иако растот на платите беше најнизок од април 2021 година, креаторите на политиките следат дали зголемувањето на каматните стапки ќе поттикне и раст на стапката на невработеност.
ФЕД одлучува
Ова е последниот извештај за вработување што банкарите од ФЕД го имаат „при рака“ пред состанокот во ноември, на кој што треба да одлучат за следните чекори во монетарната политика, додека размислуваат за четврто по ред зголемување на каматните стапки за 75 базични бодови.
Новите податоци за инфлацијата, кои што ќе бидат објавени следната недела, исто така, ќе одиграат значајна улога во носењето на одлуката. Се очекува дека извештајот ќе покаже продлабочување на проблемот на ФЕД со инфлацијата поради зголемени потрошувачки цени.
Извештајот за вработување покажува дека во септември просечните примања за работен час се зголемиле за 0,3 проценти во однос на претходниот месец и за 5 отсто во однос на ланскиот септември. Солидниот раст на просечната плата укажува на тоа дека ФЕД ќе мора да продолжат да ги зголемуваат каматните стапки, со цел да го зауздаат брзиот раст на платите, што ја зголемува потрошувачката на домаќинствата, бидејќи тоа на крајот се пресликува на цените и инфлацијата.
Банкарите неодамна јасно ја искажаа својата решителност да ја скротат инфлацијата, дури и ако тоа доведе до зголемување на невработеноста и рецесија, бидејќи сметаат дека ако не го сторат тоа на Американците ќе им биде полошо. Претседателот на ФЕД, Џереми Пауел, минатиот месец рече дека побавниот раст и полабавиот пазар на работна сила се „болни“ за јавноста, но не постои „безболен“ начин за намалување на инфлацијата.
.webp){kind=icon}
