.webp){kind=icon}
Отворањето работни места во Соединетите Американски Држави (САД) неочекувано порасна во септември, и покрај ниската стапка на невработеност. Тоа веројатно поттикнува натамошен раст на платите, а со тоа и дополнителен притисок на американските Федерални резерви (ФЕД) да продолжат со својата агресивна монетарна политика, чија цел е зауздување на инфлацијата.
Бројот на достапни работни места порасна на 10,7 милиони во септември, додека во август беа 10,3 милиони, покажува извештајот за слободни работни места и флуктуација на работната сила, кој го подготвува Министерството за труд.
Bloomberg Mercury
Прочитај повеќе
САД со најниска невработеност во последните пет децении
Стапката на невработеност неочекувано падна на 3,5 отсто, а просечната плата за работен час силно порасна
07.10.2022
Просечната процена на анкетираните економисти од страна на „Блумберг“ беше дека се очекува пад на слободните работни места на околу 9,8 милиони. Неочекуваниот раст на отворените работни позиции ја нагласува неуморната побарувачка за работници, и покрај зголемените економски пречки.
Постојаната нерамнотежа меѓу понудата и побарувачката за работна сила и натаму поттикнува силен раст на платите, зголемувајќи ги и онака силните притисоци на цените и зајакнувајќи ги очекувањата за уште едно големо покачување на каматните стапки утре.
Најновиот раст на бројот на работни места избриша поголем дел од падот на оваа бројка во август, што тогаш укажуваше на значајно намалување на побарувачката за работници.
„По минатомесечниот шок од извештајот, септемвриските податоци се враќаат на познатата патека, што укажува на силна побарувачка за работна сила“, рече Ник Банкер, раководител за економски истражувања во „Индид Хајаринг Лаб“ (Indeed Hiring Lab). „Според сите клучни показатели во овој извештај, пазарот на работна сила е отпорен“, додаде тој.
По објавата на овој извештај, индексот S&P 500 падна, а приносот од двегодишните државни обврзници порасна. Најголемо зголемување на слободните работни места има во секторите сместување и прехрана, здравствена заштита, транспорт, складирање и комунални услуги.
„Отворените работни места не се намалија во септември, и покрај јасните знаци за забавување на економските активности, а тоа ја комплицира сликата за ФЕД, кои сакаат да ја оладат жештината на пазарот на трудот“, вели Елиза Вингер, економистка од „Блумберг економикс“ (Bloomberg Economics).
Во септември се зголеми и јазот меѓу отворените работни места и невработените лица. Сега соодносот покажува дека постојат околу 1,9 работни позиции за секој невработен, додека во август тој сооднос изнесуваше 1,7.
Банкарите од ФЕД внимателно го следат тој сооднос и уште пред овој извештај укажуваа на зголемениот број на отворени работни позиции како една од причините зошто централната банка може да го олади пазарот на трудот, а со тоа и инфлацијата.
Околу 4,1 милиони Американци дале отказ во септември, што претставува мал пад во однос на претходниот месец. Вработувањето падна на околу 6,1 милиони од 6,3 милиони, колку што изнесуваше во август. Тоа укажува дека компаниите имаат проблем со пополнување на отворените работни места. Отпуштањата во меѓувреме се намалија.
Се очекува дека во октомври работодавците ќе додадат уште 190.000 работници на платните листи. Економистите очекуваат дека стапката на невработеност ќе порасне до 3,6 отсто, а просечната плата по работен час ќе забележи уште еден солиден напредок.
