Кинескиот извоз неочекувано ослабе, забавува светската побарувачка

Кинескиот извоз и увоз неочекувано паднаа за првпат во последните две години, во услови на зголемен ризик од рецесија, поради која потрошувачите во странство купуваат помалку, а домашните проблеми, како контролата на вирусот преку политиката на нулта ковид и падот на пазарот на недвижности, ја влошуваат домашната побарувачка.

Извозот во долари падна за 0,3 отсто во октомври во однос на истиот месец лани, соопшти денеска кинеската царинска управа, што е значајно помалку од претходно остварениот раст од 4,5 проценти, потенцираа економистите. Падна и увозот, при што минусот од 0,7 проценти претставува прв пад од август 2020 година. Тоа остави трговски суфицит од 85,15 милијарди долари.

Bloomberg

 

Слабоста на извозот се додава на домашните притисоци на економијата, која веќе се бори со падот на пазарот на недвижности, постојаните поместувања во контролата на ковид и послабата потрошувачка. Извозот, кој долго време остана отпорен на случувањата, беше главна потпора за заздравување на Кина во последните две години поради силната меѓународна трговија, но се чини дека тоа доживеа пресврт заедно со побарувачката, која исчезна по пандемијата, кога избувна војната во Европа, што поттикна светска инфлација и неизвесност.

„Слабиот раст на извозот веројатно го предизвикува слабата надворешна побарувачка, како и нарушувањето на испораките поради ковид-ситуацијата. Очекувам дека растот на извозот ќе остане слаб во следните неколку месеци, додека глобалната економија забавува“, рече Жанг Живеи, претседател и главен економист во „Пинпоинт асет менаџмент“ (Pinpoint Asset Management).

Овие податоци ја потврдуваат пораката од корејските трговски бројки од минатата недела, кои исто така покажаа прв пад на испораките во две години, главно како резултат на падот на побарувачката за електроника.

Речиси сите нации во еврозоната покажаа дополнителен пад на производството во октомври, додека деловната активност во САД падна веќе четврти месец по ред. Падна извозот и во САД и Европа, покажуваат статистичките податоци, како и испораките во Тајван и Хонгконг. Меѓутоа, побарувачката од Југоисточна Азија и натаму е силна.

Вредноста на извозот на апаратите за домаќинство падна најмногу од која било гранка во десетте месеци годинава и е за 11,5 проценти помал во однос на претходната година. Извозот на мебел, на опрема за осветлување и на медицински апарати, исто така, падна во тој период.

Кинеска побарувачка

Падот на увозот беше широкораспространет, со кинеските набавки од Австралија, САД, Јапонија, Јужна Кореја и Тајван. Увозот на железна руда во десетте месеци годинава падна во однос на минатата година поради континуираниот пад на изградбата на станови, што ја уништува побарувачката за челик и други градежни материјали.

„Изненадувачкиот пад на кинескиот извоз во октомври, прв на годишно ниво од мај 2020 година, нуди јасен доказ дека глобалната побарувачка опаѓа. Заедно со падот на недвижностите и ограничувањата со политиката на нулта ковид, која го поткопува растот, политичкиот стимул ќе биде клучен за да продолжи заздравувањето“, вели Ерик Жу, економист од „Блумберг“.

Bloomberg

 

Агресивното заострување на политиките на големите развиени земји ги зголемува стравовите од рецесија во светот, што би можело дополнително да ѝ наштети на побарувачката за производи од Кина. Американската централна банка минатата недела по шести пат оваа година ги зголеми каматните стапки. Се очекува дека европските држави ќе го следат тој пример.

Епидемијата на ковид и строгите мерки за контрола во Кина се уште еден голем извор на загриженост. Да ги оставиме настрана ограничувањата на движењето, проблемот е тоа што непоколебливата преданост на нацијата кон стратегијата за нулта ковид ги урива надежите за какво било скорашно подобрување на економската ситуација, поттикнувајќи ги кинеските домаќинства да штедат и да ја намалуваат потрошувачката.

Кинеските власти на минатиот партиски конгрес понудија мали знаци за планови за спасување на економијата, што предизвика историски крах на берзите. Инвеститорите би требало да имаат појасна слика за тоа дали Кина ќе го ублажи својот пристап на нулта толеранција во борбата против вирусот и дали Кина ќе ја зголеми поддршката за пазарот на недвижности во следниот период.

Во моментов нема коментари за веста. Биди прв да коментира...

Остави коментар