Стоките одново ќе бидат класа на средства со најдобри резултати во 2023 година, овозможувајќи поврат за инвеститорите од повеќе од 40 отсто, според „Голдман Сакс“ (Goldman Sachs Group Inc).
Банката од Волстрит соопшти дека иако првиот квартал може да биде „разбрануван“ поради економската слабост во САД и Кина, сепак недостигот од суровини од нафта до природен гас и метали ќе ги зголеми цените по тоа.
„Голдман“ предвиде повеќегодишен суперциклус на стоките кон крајот на 2020 година. Банката се задржа на тој став дури и кога цените на енергијата паднаа во последните месеци поради пандемиските ограничувања во Кина и глобалното економско забавување што ја потиснува побарувачката.
„И покрај тоа што има речиси удвојување на цените на многу стоки до мај 2022 година, гледано година за година,
капиталните расходи во целиот стоковен комплекс разочараа“, напишаа аналитичарите на „Голдман“, вклучувајќи ги Џеф Кари и Саманта Дарт на 14 декември. „Ова е најважното откритие на 2022 година - дури и извонредно високите цени забележани претходно годинава не можат да создадат доволен прилив на капитал и оттука е одговорот на понудата за решавање на долгорочните кусоци“.
Банката очекува вкупниот повратен индекс (S&P GSCI Total Return Index) - водечка мерка за движењата на цените на стоки - да се зголеми за 43 отсто во 2023 година. Тоа би додало на добивката од 24 отсто досега годинава. За споредба, американските акции паднаа за околу 16 отсто, а и државните обврзници исто така забележаа пад.
„Голдман“ ни оддалеку не е сам меѓу аналитичарите и инвеститорите во однос на биковската позиција кон стоките. Многумина велат дека недостигот од истражувања за нови нафтени полиња и инвестиции во рудници доведува до намалување на резервите и тесни пазари. Најдобрите 15 хеџ-фондови фокусирани на стоки годинава ги зголемија своите средства за 50 отсто, на 20,7 милијарди долари, според прелиминарните податоци на „Бриџ алтернатив инвестментс“ (Bridge Alternative Investments Inc).
„Без доволно капитални трошоци за да се создадат резервни капацитети за снабдување, стоките ќе останат заглавени во состојба на долгорочен недостиг, со повисоки и понестабилни цени“, велат аналитичарите на „Голдман“.
Depositphotos
Банката прогнозира дека суровата нафта брент ќе се искачи на 105 долари за барел во последниот квартал на 2023 година, од 82 долара по колку што се тргува денес. Според нивните прогнози, цената на бакарот ќе скокне до 10.050 долари за тон, од околу 8.400 долари, а азискиот репер за течен природен гас ќе се покачи од 33 долари за милион британски термални единици на 53,10 долари.
Сепак, некои ривалски аналитичари се скептични, велејќи дека економиите се премногу кревки за стоките да добијат повеќе.
„Плимата може да се сврти“, изјавија месецов аналитичарите на „Ситигруп“ (Citigroup Inc.), предводени од Ед Морс. „Можноста за глобална рецесија претставува закана за класата на средства што доживеа ренесанса во последните две години“.
.webp){kind=icon}
