Цените на недвижностите низ светот се оладија бидејќи повисоките трошоци за кредити држат многу купувачи настрана.
Јужна Кореја помина најлошо, бидејќи Банката на Кореја ги зголеми каматните стапки за да ја спречи инфлацијата. Просечните цени на домовите таму паднаа за 7,5 проценти во третиот квартал споредено со истиот период во претходната година. Пад забележаа и Хонгконг, Перу, Кина и Нов Зеланд.
Генерално, цените на имотите во 56 земји и територии се зголемија со стапка од 8,8 отсто во третиот квартал, што е намалување од 10,9 проценти, колку што изнесуваше нивниот врв, достигнат во првите три месеци од годинава, покажува новиот извештај на консултантската куќа за недвижности „Најт Френк“ (Knight Frank). Но ако се земе предвид инфлацијата, тоа би било пад од 0,3 проценти на годишно ниво.
Цените во Обединетото Кралство и во Канада паднаа на основа приспособена на инфлацијата. Извештајот ги искористи податоците од вториот квартал за САД и откри дека номиналните цени се зголемени за 11 отсто до 30 јуни споредено со истиот период минатата година. Американскиот пазар значително се залади во последниве месеци, при што повисоките хипотекарни стапки ја погодија побарувачката и поттикнаа некои продавачи да ги повлечат имотите од пазарот.
Годишна споредба на цените на недвижностите во третиот квартал / Bloomberg Mercury
Земјите како Португалија, Сингапур, Ирска и Исланд забележаа двоцифрен пораст во третиот квартал, помогнат од враќањето на странските инвестиции и иселениците, како и силната домашна побарувачка.
Од 150 града следени од консултантската куќа, 16 забележаа пад на цените. Велингтон (Нов Зеланд) го предводи падот со намалување на цените од дури 17,3 проценти, додека цените се намалија за 9,8 отсто во Буенос Аирес, за 3,6 проценти во Сиднеј и за 2,1 отсто во Венеција (Италија).
„Забавувањето на цените треба да трае подолго отколку што предвидувавме. Пазарите со најголем скок на каматните стапки почнуваат да забележуваат вистински пад“, рече Кејт Еверет-Ален, глобална раководителка за резиденцијални истражувања во „Најт Френк“.
.webp){kind=icon}
