Светската банка ги намали своите прогнози за раст за поголем дел земји и региони и предупреди дека новите негативни шокови може да ја доведат глобалната економија во рецесија. Глобалниот бруто-домашен производ веројатно ќе се зголеми за 1,7 процент оваа година, што е само половина од проекциите на банката во јуни, објави Светската банка, чие седиште е во Вашингтон.
Тоа би било третото најлошо остварување во последните три децении, по контракциите во 2009 и 2020 година. Банката, која ги намали и процените за раст за 2024 година, рече дека меѓу клучните причини за надолната корекција се постојаната инфлација и повисоките каматни стапки, како и влијанието на руската инвазија на Украина и падот на инвестициите.
Прогнози за економски раст од Светската банка / Bloomberg Mercury
„Кризата со која се соочува развојот се интензивира и веројатно застојот во глобалниот просперитет ќе продолжи“, напиша претседателот на Светската банка, Дејвид Малпас, во предговорот на полугодишниот извештај за глобалните економски перспективи на банката. Тој рече дека БДП на пазарите и економиите во развој на крајот на следната година ќе биде околу шест проценти под нивото што се очекуваше во пресрет на пандемијата на ковид.
„Прелевањата од периодот на изразена слабост во САД, Кина и Европската Унија (ЕУ) ги влошуваат другите проблеми со кои се соочуваат посиромашните нации“, велат од банката. Додека инфлацијата е умерена постојат знаци дека притисоците се зголемуваат, при што централните банки мора да ги покачуваат каматните стапки побрзо од очекуваното.
„Комбинацијата на бавен раст, заострување на финансиските услови и голема задолженост веројатно ќе ги ослабне инвестициите и ќе предизвика неисполнување на обврските на претпријатијата. Потребна е итна глобална акција за да се ублажат ризиците од глобална рецесија и должничка криза“, проценува Светската банка.
Корекции на проекциите за БДП од Светската банка / Bloomberg Mercury
Банката, која го преиспитува својот оперативен модел, рече дека фокусот на следните области е клучен, со оглед на ограничениот простор на политика: креаторите на националните политики мора да се погрижат секоја фискална поддршка да биде фокусирана на ранливите групи, инфлациските очекувања мора да останат добро закотвени, а финансиските системи мора да продолжат да бидат отпорни.
Светската банка повика на силно зголемување на инвестициите за земјите во развој, вклучувајќи и ново финансирање од меѓународната заедница, како и пренамена на постојните трошоци, како што се неефикасните субвенции за земјоделство и гориво.
„Иако светот сега е многу во тесно, не треба да има простор за дефетизам. Постојат значајни реформи што би можеле да се преземат сега за да се зајакне владеењето на правото, да се подобрат изгледите и да се изградат посилни економии со појак приватен сектор и подобри можности за луѓето“, рече претседателот на Светската банка, Малпас.
.webp){kind=icon}
Во моментов нема коментари за веста. Биди прв да коментира...