.webp){kind=icon}
Бројот на слободни работни места кај работодавците во САД неочекувано се зголеми на крајот на 2022 година, што го илустрира солидниот апетит за работна сила што Федералните резерви (ФЕД) го гледаат како една од последните пречки за намалување на инфлацијата.
Бројот на достапни работни позиции се зголеми на петмесечен максимум од нешто повеќе од 11 милиони во декември, додека во ноември таа бројка изнесуваше 10,4 милиони, покажаа резултатите од Анкетата за отворени работни места на Министерството за труд. Просечната процена во анкетата на „Блумберг“, спроведена меѓу економистите, укажуваше на пад на 10,3 милиони слободни работни места.
Податоците се во согласност со пазарот на работната сила, каде што побарувачката за работници далеку ја надминува понудата и претставува ризик од постојан притисок за зголемување на платите, што може повторно да ја разгори инфлацијата. Тоа веројатно ќе биде главна тема на разговор на претседателот на ФЕД, Џереми Пауел, на неговиот денешен попладневен говор на крајот од првиот состанок на централните банкари, на кој се разгледуваат идните чекори на централната банка во 2023 година. Се очекува официјалните лица да го забават темпото на зголемување на каматните стапки на една четвртина поен.
