Претставниците на Федералните резерви (ФЕД) можеби ќе треба да ги зголемат каматните стапки до 6,5 проценти за да ја победат инфлацијата, покажува новото истражување, кое остро го критикува првично бавниот одговор на централната банка на растечките цени.
Во трудот претставен денеска на конференција во Њујорк, петмина економисти и академици од Волстрит тврдат дека креаторите на политиката сè уште имаат преоптимистички поглед и дека ќе треба да нанесат одредена економска болка за да ги стават цените под контрола.
„Нашата анализа фрла сомнеж врз способноста на ФЕД да создаде меко слетување, во кое инфлацијата ќе се врати на целта од два отсто до крајот на 2025 година без блага рецесија“, напишаа тие.
Академската студија на 55 страници вклучува низа симулации за предвидување на веројатните патишта за политиката на ФЕД во делот на референтните каматни стапки. Компјутерските модели сугерираат дека стапките ќе достигнат врв од 5,6 отсто, шест или 6,5 отсто во втората половина на 2023 година.
ФЕД веќе ги зголеми стапките од речиси нула пред една година до опсег од 4,5 до 4,75 проценти, при што официјалните лица во декември предвидуваа дека годинава каматите ќе достигнат до 5,1 отсто.
Податоците објавени денеска покажаа дека претпочитаните мерки за инфлација на ФЕД неочекувано се забрзаа во јануари, што ги поттикна инвеститорите да ги зголемат облозите за дополнителни зголемувања на каматните стапки.
Авторите Стивен Чекети од универзитетот „Брандеис“, Мајкл Фероли од ЏП Морган Чејс (JPMorgan Chase & Co), Питер Хупер од Дојче банк (Deutsche Bank AG), Фредерик Мишкин од универзитетот „Колумбија“ и почесниот професор на Универзитетот во Њујорк, Кермит Шенхолц, го претставија својот труд на годишниот форум за политики, спонзориран од Универзитетот во Чикаго (Chicago Booth School of Business). Тие анализираа 16 различни епизоди од 1950 година во САД и неколку други големи економии кога централните банки агресивно ја заострувале политиката за да ги намалат цените. Сите тие беа поврзани со рецесија.
„Во сегашните околности, кои веќе вклучуваат значително заострување на политиката (и изгледи за понатамошно ограничување), беспрекорна дезинфлација би била без преседан“, напишаа тие. Меѓутоа, тие ја пофалија Банката на федерални резерви за напуштање на постепеноста минатата година и за лансирање на својата серија на агресивни зголемувања на каматните стапки и беа оптимисти дека овој хаос ќе ја заврши работата.
„Доколку креаторите на политиката го задржат рестриктивниот став до 2023 година, а можеби и понатаму, се чини дека ФЕД е на добар пат да се приближи до целта за инфлација од два отсто во разумен период“, велат тие.
.webp){kind=icon}
Во моментов нема коментари за веста. Биди прв да коментира...