.webp){kind=icon}
Подобрувањето на деловните услови во Дубаи забави во февруари, бидејќи фирмите пријавија забавување на новите нарачки и обновени ценовни притисоци.
Индексот на менаџери за набавки во Дубаи на „Ес енд пи глобал“ (S&P Global) во февруари е 54,1 за разлика од 54,5, колку што беше во јануари. Тоа сè уште е над границата од 50, што ја дели експанзијата од контракцијата, но е најниското ниво во истражувањето во последната година. Тоа претставува и пад во споредба со поширокото подрачје на Обединети Арапски Емирати, чиј дел е и Дубаи. Индексот на менаџери за набавки на Обединетите Арапски Емирати минатиот месец беше 54,3, што е искачување на највисоко ниво од крајот на минатата година.
Промена на индексот на менаџери за набавки во Дубаи и ОАЕ / Bloomberg Mercury
„Растот на новите нарачки во Дубаи падна на најниско ниво во последните 13 месеци. Но индексот сепак покажа силни перформанси во ненафтениот сектор, каде што новите нарачки и активност продолжија да растат“, рече Дејвид Овен, виш економист во „Ес енд пи глобал“ (S&P Global Market Intelligence).
Споредено со јануари забрза и растот на производството. Отворањето нови работни места само благо порасна и е на најниско ниво во последните пет месеци, покажува индексот. Иако инфлацијата во оваа заливска земја сè уште е на ниско ниво во споредба со другите големи деловни центри, притисокот врз трошоците сè уште е во пораст. Компаниите во Дубаи мораа да ги намалат трошоците седми месец по ред за да ја поддржат побарувачката, покажува истражувањето.
Времето на испорака на доставувачите нагло се подобри во текот на февруари на највисоко ниво во последните три и пол години, се наведува во извештајот. Бизнисите генерално беа пооптимистички за идната активност, според Овен, одразувајќи ја довербата дека условите на побарувачката ќе продолжат да се подобруваат и ќе избегнат нарушување од послабата глобална економска клима.
