.webp){kind=icon}
Американската министерка за финансии Џенет Јелен изјави дека единствениот добар исход во тековниот застој во однос на американскиот долг е Конгресот да ја зголеми границата.
„Она што треба да го добијат како порака глобалните пазари, американските домаќинства и бизниси е дека имаме Конгрес што е посветен на плаќање на сметките“, рече Јелен во петокот во интервју за ТВ „Блумберг“.
„Ако Конгресот не го стори тоа, тоа навистина го намалува нашиот кредитен рејтинг“, додаде Јелен, говорејќи на маргините на собирот на финансиските претставници на Групата седум (Г7) во Јапонија.
Прочитајте повеќе: Ако САД не го подигнат лимитот за задолжување, под закана е националната безбедност
Јелен одби да каже што ќе направи нејзиниот сектор доколку Конгресот не го подигне или суспендира лимитот на долгот пред Министерството за финансии да не може да ги покрие сите обврски на владата.
Претседателот Џо Бајден и претседателот на Претставничкиот дом, Кевин Мекарти, го одложија состанокот за плафонот на долгот што беше закажан за петок. Според упатените, одложувањето е знак дека разговорите бележат напредок.
Бајден и републиканците во Конгресот со недели се во несогласување околу зголемувањето на лимитот за задолжување на американската сојузна влада од 31,4 билион долари. Лидерите на Републиканската партија побараа ветувања за идни намалувања на трошоците пред да одобрат повисоко ниво. Претседателот Бајден инсистираше на „чисто“ зголемување, со одделни разговори за буџетот.
Американската влада го достигна својот законски лимит за задолжување во јануари и оттогаш Министерството за финансии употребува посебни сметководствени мерки за да ја задржи готовината на располагање. Јелен му порача на Конгресот дека тие мерки би можеле да истечат веќе на 1 јуни.
