Индија се надева дека директно ќе соработува со Европската Унија (ЕУ) во врска со предложениот данок на јаглерод, наместо проблемот да го решава преку Светската трговска организација (СТО), велат лица запознаени со ова прашање.
Главниот извозник на челик и алуминиум, Индија, бара исклучоци што ќе ги заштитат нејзините мали производители од давачките наметнати од механизмот за приспособување на границите на јаглеродот (или ЦБАМ-CBAM), кој ќе оданочува дел од увозот од земји што не ја одредуваат цената на јаглеродот на начин како што тоа го прави Европа.
Индија поднесе документ за дискусија до СТО за тоа како регулативите за заштита на животната средина влијаат на трговијата, но конкретно во однос на ЦБАМ таа се надева дека директните преговори со ЕУ ќе дадат релативно брзо решение, рекоа изворите, барајќи да не бидат идентификувани бидејќи дискусиите се тајни.
Новите давачки на ЕУ се дизајнирани да го спречат таканареченото истекување на јаглерод, во кое компаниите со седиште во блокот го преместуваат своето најинтензивно производство со јаглерод во странство за да ги искористат предностите на помалку строгите климатски политики или даноци.
ЦБАМ ќе започне да се спроведува прво со тригодишен период наменет само за известување, почнувајќи од 1 октомври годинава, а финансиските приспособувања ќе почнат од 2026 година. Како дел од тековните преговори за договор за слободна трговија со ЕУ, Индија се залага да се изземат нејзините мали и средни претпријатија, слично на тоа што Европа го имаше за некои од своите домашни компании, рече еден од изворите.
Индија исто така размислува за домашен механизам сличен на ЦБАМ и што би значело тоа за цената на увозот, рече еден од изворите.
„Дефинитивно ЦБАМ е трговска бариера. Има голем број прашања што треба да се разјаснат“, рече Алок Сахај, генерален секретар на индиската асоцијација за челик, во одговорот испратен по електронска пошта до „Блумберг њуз“ (Bloomberg News). „Владата треба да иницира дијалог на повеќе нивоа за да се осигури дека индискиот челичен сектор, кој во моментов извезува од 3,5 до 4 милиони тони челик во земјите во Европската Унија, ќе добие еднакви услови за игра“, додаде тој.
Индиското министерство за трговија не одговори на електронската пошта со барање за коментар.
„Данокот на јаглерод на ЕУ се спротивставува на духот на заедничките, но диференцирани одговорности од Парискиот договор, кој признава дека земјите имаат различни должности и способности да се справат со негативните влијанија од климатските промени“, рече главниот економски советник на Индија, В. Ананта Нагесваран, во интервју минатиот месец.
.webp){kind=icon}
