Многу водечки економии ќе влезат во рецесија во следните 12 месеци поради растот на трошоците за живот и заострувањето на економските политики, кои всушност на глобално ниво создаваат синхронизирано забавување на растот, сметаат аналитичарите на јапонската финансиска холдинг компанија „Номура“ (Nomura).
Тие сметаат дека во рецесија, заедно со САД, ќе влезат и еврозоната, Обединетото Кралство, Јапонија, Јужна Кореја, Австралија и Канада.
Покрај тоа, тие додаваат дека централните банки во овие области, во обид да ја ограничат инфлацијата, најверојатно ќе згрешат на страната на прекумерно затегнување на монетарната политика пред повторно да ги намалат каматните стапки во 2023 година.
„Растечките знаци дека светската економија влегува во синхронизирано забавување на растот, односно дека земјите не можат да се потпрат на растот на извозот за да го стимулираат растот, нè поттикнаа да прогнозираме повеќекратна рецесија“, посочуваат од „Номура“.
Високата инфлација ќе продолжи бидејќи нагорниот притисок врз цените на суровините се прошири на услугите, цените на становите и платите, додаваат од таму.
Сепак, оценуваат дека длабочината на рецесијата ќе биде различна. Така, за САД предвидуваат поплитка, но подолга рецесија која би траела пет квартали, почнувајќи од последниот квартал годинава. Во еврозоната сегашното тонење би можело да биде значително подлабоко доколку Русија целосно престане да испорачува гас за континентот.
Според нивните прогнози, економскиот пад следната година и во САД и во еврозоната би можел да биде еден процент. За Јужна Кореја сметаат дека во третиот квартал би можела да доживее пад од 2,2 отсто, исто како што постои ризик од поголема рецесија од еден отсто за Австралија и Канада доколку порастот на каматните стапки доведе до колапс на пазарот на недвижности.
Поради подоцнежното економско отворање и сегашните политики за економска поддршка, Јапонија може да има најблага рецесија, додека Кина е исклучок бидејќи нејзината економија закрепнува, иако ризикот од нови затворања поради политиката на нулта толеранција кон Ковид-19 и натаму останува на сила.
.webp){kind=icon}
