Сè помалата употреба на јаглен ќе остави без работа 400.000 рудари

Сè помалата употреба на јаглен во енергетскиот систем ќе доведе до отпуштање на сто рудари дневно до 2035 година, главно во Кина и во Индија.

Дотогаш затворањето на рудниците ќе елиминира околу 15 отсто од глобалните работни места во ископувањето јаглен, што е вкупно околу 400.000, според новиот извештај објавен неделава од „Глобал енерџи монитор“ (Global Energy Monitor). Бројката веројатно ќе се зголеми на речиси милион до 2050 година, бидејќи светот се врти кон поевтино и поеколошко производство на енергија од ветер и соларна енергија.

Загубите на работни места нагласуваат некои од општествените предизвици со кои се соочуваат компаниите и владите додека преминуваат од фосилни горива кон обновливи извори на енергија, за да ги избегнат најлошите влијанија од климатските промени. Работните места во рударството изгубени поради автоматизацијата, ефикасноста и стоковните циклуси станаа проблематично политичко прашање од САД, преку Европа, до Австралија.

Еден начин да се ублажат отпуштањата е да им се даде приоритет на поранешните рудари за вработување на работни места како што се рехабилитација на земјиште и ублажување на влијанието врз животната средина по затворањето на рудниците, се наведува во извештајот.

„Коал Индија“ веќе има регистрирано дека нејзината работна сила се намалила од 310.000 во 2017 година на 240.000 годинава Bloomberg

Кина произведува и користи повеќе од половина од јагленот во светот и е дом на повеќе од 1,5 милион работни места во рударството, според „Глобал енерџи монитор“. Само во нејзината провинција Шанси, до 2050 година најверојатно ќе бидат изгубени повеќе од 240.000 работни места во рударството. Кинеската влада бара од компаниите постепено да ги заменат рударите со автоматизирани машини, делумно за да ги намалат социјалните трошоци од идните затворања на рудниците.

Државната рударска компанија „Коал Индија“ (Coal India), која произведува повеќе јаглен од која било друга компанија, најверојатно ќе се соочи со најголеми отпуштања, со потенцијално намалување на речиси 74.000 работници до 2050 година, се наведува во извештајот.

Компанијата веќе има регистрирано дека нејзината работна сила се намалила од 310.000 во 2017 година на 240.000 годинава. Бројот на вработени се намалува за околу 13.000-14.000 луѓе годишно, темпо што се очекува да се забрза поради пензионирањето и ангажманот на надворешни соработници, што ќе ги ограничи новите вработувања, велат претставници на компанијата.