text size
Енергетската криза минатата година влијаеше на зголемувањето на производството и потрошувачката на јаглен во Европа, континентот што беше најмногу зависен од рускиот гас пред војната во Украина. Земјата што увезуваше најмногу руски гас е најголемата и најсилна европска економија - Германија. Според последните податоци на „Евростат“, оваа земја лани произвела и потрошила најголемо количество јаглен во Европа.
Колку на Германија ѝ недостига руски гас покажува неодамнешната изјава на германскиот министер за економија Роберт Хабек дека земјата можеби ќе мора да ги затвори своите индустриски капацитети доколку договорот за проток на гас на Украина со Русија не биде продолжен по истекот, на крајот од годинава.
Прочитајте повеќе:
Тој истакна дека треба да се почитуваат правилата за споделување на товарот од евентуалниот недостиг од гас во Источна Европа, што значи дека Германија ќе мора да извезува гас, па производствениот сектор во најголемата европска економија може да доживее ограничувања или прекини во снабдувањето.
Производството на јаглен во 2022 е за пет отсто поголемо отколку во 2021 година
Во 2022 година производството на јаглен во Европската Унија (ЕУ) изнесуваше 349 милиони тони, што е за пет отсто повеќе во однос на претходната година, додека потрошувачката на јаглен беше 454 милиони тони или два отсто повеќе во однос на 2021 година.
ЕУ најмногу произвела кафеав јаглен, во износ од 294 милиони тони, што е зголемување за шест отсто во однос на 2021 година.
Кафеав јаглен во ЕУ произведуваат девет земји-членки, а главен производител е Германија. Минатата година Германија учествуваше со околу 44 отсто од вкупното производство на кафеав јаглен во ЕУ (131 милион тони). Други земји-членки што произведуваат кафеав јаглен се Полска (19 проценти), Бугарија (12 проценти), Чешка (11 проценти), Романија, Грција, Унгарија, Словенија и Словачка.
Кога станува збор за потрошувачката, бројките за потрошувачка за лигнит и кафеав јаглен се многу слични со производството, бидејќи овие видови јаглен обично не се тргуваат, туку се користат во домашни рамки за производство на електрична енергија.
Податоците на „Евростат“ покажуваат дека Германија е и најголемиот потрошувач на кафеав јаглен во Европа.
Eurostat
Додека лигнитот ретко е главно гориво за производство на електрична енергија во земјите на ЕУ, тој постои во неколку земји од Западен Балкан. Сепак, во последниве години, уделот на лигнитот во производството на електрична енергија е намален и во нашиот регион, каде што хидро и природниот гас се во пораст.
Производство на тврд јаглен во 2022 година
Јагленот е поделен на тврд јаглен, кафеав јаглен и лигнит. Кога станува збор за производството на тврд јаглен, кој има поголема енергетска содржина, ЕУ достигна речиси 55 милиони тони во 2022 година. Во моментов, во ЕУ останаа само два производитела на тврд јаглен: Полска и Чешка.
Потрошувачката на тврд јаглен во 2022 година достигна 160 милиони тони, за 11 отсто помалку од 2019 година. Полска (38 отсто) и Германија (25 отсто) сочинуваат речиси две третини од вкупната потрошувачка на тврд јаглен во ЕУ во 2022 година, а потоа следуваат Италија, Холандија, Франција, Шпанија и Чешка.
.webp){kind=icon}
