Меѓународниот монетарен фонд (ММФ) значително ќе ги намали проекциите за глобалниот раст во новата проценка, поради намалувањето на просторот за делување предизвикано од растечките економски ризици.
„Зголемените цени на храната и енергијата го забавуваат протокот на капитал кон пазарите во развој, пандемијата и економското забавување на Кина ги зголемуваат предизвиците за креаторите на политиките“, рече Џејла Пазарбасиоглу, директорката за стратегија, политика и проценки на ММФ, на денешната панел дискусија во Бали.
„Шок по шок силно влијае на глобалната економија“, нагласи таа.
По состанокот на министрите за финансии и гувернерите на централните банки на групата Г-20 на кој изостана заедничка изјава, Пазарбасиоглу истакна дека станува сè потешко да се координира глобалниот одговор за инфлацијата и загриженоста од рецесија.
Поради војната во Украина, ММФ веќе ги намали изгледите за глобалниот раст за оваа година од 4,4 отсто на 3,6 отсто во извештајот објавен во април.
„Во извештајот што треба да биде објавен овој месец, значително ќе ги намалиме проекциите за раст“, изјави Пазарбасиоглу.
Bloomberg
Централните банки ширум светот се борат да го најдат вистинскиот одговор за зголемените цени предизвикани од проблемите со синџирите на снабдување.
„Можностите за благо забавување се намалуваат, иако сè уште мислиме дека е можно, но сигурни сме дека нема да биде лесно да се постигне“, рече Хјун Сонг Шин, економски советник и директор за истражување во Банката за меѓународни порамнувања, учесник на панелот.
„Онаму каде што централните банки донесуваат брзи и решителни одлуки за монетарната политика и имаат одговор на инфлацијата, поверојатно е благо забавување“, додаде тој.
Банката на Индонезија, земјата домаќин на состанокот на Г-20, е исклучок бидејќи ги одржува каматните стапки на рекордно ниско ниво. Гувернерот Пери Варџијо ја бранеше политиката, велејќи дека прераното затегнување би претставувало ризик за земјата, која само што излезе од рецесија предизвикана од пандемијата, да падне во стагфлација.
.webp){kind=icon}
