Економистите се дефинитивно пооптимистички расположени за економскиот раст во САД отколку пред шест месеци, бидејќи предвидуваат активност речиси на исто ниво како во 2023 година, поради силниот пазар на труд, кој ја зголемува потрошувачката без да влијае на пораст на инфлацијата.
Годинава се предвидува раст во просек од 2,2 отсто, повеќе од двојно побрзо од очекуваното во септември, според најновото месечно истражување на „Блумберг“ меѓу економистите. Шансите за рецесија во следните 12 месеци паднаа на 35 отсто, што е најниско ниво од јули 2022 година и помалку од 55 отсто во септември.
Испитаниците очекуваат работодавците да додадат просечно 150.000 работни места месечно во 2024 година - над четири пати повеќе од она што го предвидуваа пред шест месеци, што, пак, ќе доведе до зголемување на трошоците на домаќинствата за два процента. Активноста на потрошувачите сочинува околу две третини од американската економија.
Истражувањето покажа дека економистите очекуваат раст и на приватните инвестиции за 2,4 отсто годинава, наспроти растот од еден отсто во септември.
И покрај ревидираните прогнози и изненадувачки силните податоци за инфлацијата од јануари и февруари, економистите останаа на своите изгледи за поскромен раст на цените.
Тие прогнозираат дека индексот на основни лични трошоци - фаворизираниот мерач за базичната инфлација на Федералните резерви - во просек ќе изнесува 2,5 проценти во 2024 година. Тоа е само 0,1 отсто пониско од она што го очекуваа во септември и, доколку се реализира, ќе претставува значително подобрување во однос на 2,9 отсто забележани на крајот на минатата година.
Падот на инфлацијата ќе им овозможи на креаторите на политиката од Фед да започнат со намалување на каматните стапки до јуни, според просечната процена на испитаниците, и уште двапати пред крајот на годината.
Две намалувања
Вкупниот број на намалувања на стапките е за еден помалку од очекувањата на економистите минатиот месец и во согласност со претставниците на централната банка. Сепак, просечната проекција на креаторите на политиката од Фед на нивниот последен состанок беше блиску до две намалувања годинава.
„Фед не сака да предизвика рецесија ако може да ја избегне и веруваме дека ќе биде во можност да почне да ја движи монетарната политика од построга кон понеутрална позиција пред летото“, рече Џејмс Најтли, шеф за меѓународна економија во ИНГ (ING Financial Markets).
Испитаниците на истражувањето на „Блумберг“ спроведено од 18 до 21 март сè уште очекуваат повисоките стапки на крајот да имаат повеќе тежина врз БДП. Најновата средна прогноза за раст во 2025 година е 1,7 отсто, што е малку под прогнозата во септември.
.webp){kind=icon}