Глобалните инвеститори и светските економии ја очекуваат денешната одлуката на Федералните резерви (ФЕД) на САД за ново зголемување на каматните стапки, со цел да се потисне зголемената инфлација. Се очекува дека ФЕД ќе ги зголеми каматните стапки за 75 базични поени, но има и такви кои предвидуваат зголемување за дури 100 базични поени.
По дводневни размислувања, претставниците на ФЕД денеска треба да објават колку ќе ги зголемат трошоците за задолжување. Во јуни, претседателот на ФЕД, Џером Пауел и неговите колеги одобрија зголемување на каматните стапки за 75 базични поени, а се очекува дека по денешната корекција, би можело да се укаже на продолжување на тој тренд во наредните месеци. Каматните стапки во јуни се зголемија најмногу од 1994 година.
Сепак, и покрај интервенциите на ФЕД, инфлацијата во САД, како и во остатокот од светот, не стивнува. Во јуни цените во САД се зголемија за 9,1 отсто поради високите трошоци за бензин, храна и комунални услуги. Ова е највисоката стапка на инфлација во САД од 1981 година.
„Сè е во играта“, им рече на новинарите претседателот на ФЕД Атланта, Рафаел Бостик, по објавувањето на резултатите од инфлацијата, која се зголеми побрзо од очекуваното до јуни. На новинарско прашање дали високата инфлација вклучува зголемување на стапките за цел процентен поен, тој одговори: „Тоа би значело сè“.
Зголемувањето од 100 базични поени би било најголемото од раните 90-ти, кога ФЕД почна директно да ги користи каматните стапки за да ја води монетарната политика.
Американците се бесни поради високите цени, а критичарите ги обвинуваат ФЕД за нивниот првичен бавен одговор на инфлацијата. Гневот на граѓаните се прелеа и во податоците. Довербата на американските потрошувачи во економијата и пазарот на трудот падна во јули на најниско ниво од февруари 2021 година, поради послабиот економски раст еродиран од инфлацијата.
Сепак, и покрај сегашните околности, американската министерка за финансии, Џенет Јелен, изрази доверба во борбата на ФЕД против инфлацијата и рече дека не гледа знаци оти американската економија е во поширока рецесија.
„Веројатно ќе видиме забавување во отворањето на нови работни места“, изјави претходно Јелен. „Не мислам дека тоа е рецесија. Рецесијата е широка слабост во економијата. Не го гледаме тоа во моментот“, додаде таа.
.webp){kind=icon}
