.webp){kind=icon}
Огромно мнозинство економисти анкетирани од „Блумберг“ (Bloomberg) очекуваат Фед да ги намали каматните стапки за само четвртина процентен поен во септември. Наспроти ваквите проекции се големите банки, чии аналитичари бараат поголемо намалување на трошоците за задолжување во САД на следниот состанок.
Речиси четири петтини од економистите анкетирани од „Блумберг“ очекуваат Федералните резерви да ги намалат стапките во опсег од 5 до 5,25 проценти на состанокот на 18 септември, додека повеќето од преостанатите очекуваат поголемо намалување. Просечната прогноза покажува само 10 проценти шанса дека Фед ќе ги намали каматните стапки на итен состанок пред септември.
Централните банкари рекоа дека нема потреба од агресивни потези, иако извештајот за пазарот на трудот во јули покажа дека вработувањата значително забавиле, а стапката на невработеност се искачила на највисокото ниво во речиси три години.
Прочитај повеќе
Банките на Волстрит бараат агресивно намалување на стапките од страна на Фед
Економистите од Банката на Америка, „Ситигруп“, „Голдман Сакс“ и „ЏП Морган“ ги променија своите прогнози.
03.08.2024
Од друга страна, челниците на Фед предводени од претседателот Џером Пауел рекоа дека нивниот фокус сега ќе биде на вториот од двата мандата - а тоа е обезбедување максимална вработеност. Тие исто така продолжуваат да се трудат да ја намалат стапката на инфлација до целта од два отсто, пишува „Блумберг“.
Некои големи банки на Волстрит, вклучувајќи ги и „ЏП Морган“ (JPMorgan Chase & Co.) и „Ситигруп“ (Citigroup Inc.), ги ревидираа своите проекции по извештајот за пазарот на трудот и прогнозираат намалување од половина процентен поен следниот месец. Пазарите на капиталот очекуваат намалување на каматните стапки за еден процентен поен годинава, а за 50 базични поени во септември.
Каматните стапки во САД според средните вредности од истражувањето
Bloomberg
Сепак, консензусот меѓу економистите е дека Фед ќе одлучи да ги намали каматните стапки за по 25 базични поени на своите состаноци во септември, ноември и декември. Потоа, во првиот квартал од 2025 година каматните стапки ќе се намалат за уште 25 базични поени. Во анкетата учествуваа 51 економист, а истражувањето траеше од 6 до 8 август, по распродажбата на светските берзи.
Повиците за големи намалувања „се претерани и претставуваат условен рефлекс“, изјави за „Блумберг“ Рајан Свит, главен американски економист во „Оксфорд економикс“.
„Во ретроспектива, Федералниот комитет за отворен пазар ги намали каматните стапки надвор од редовните состаноци (или за повеќе од 25 базични поени) само кога имаше очигледен економски шок или кога податоците беа полоши од сега“, додаде тој.
Инаку, бројот на новите поднесоци за бенефиции поради невработеност во САД минатата недела падна најмногу во изминатите 12 месеци. Тоа донекаде ги смири пазарите на капиталот, кои претходно потонаа поради стравувањата дека состојбата на пазарот на трудот драстично ќе се влоши.
Овој индикатор падна за 17.000, на 233.000, во неделата што заврши на 3 август, покажаа податоците на Министерството за труд. Во државите што забележаа поголем раст во последните недели (Мичиген, Мисури и Тексас) бројот на апликанти беше помал.
Бројот на барања што не се поднесени првпат, што е показател за бројот на луѓе што примаат пари од бирото, се искачи на 1,88 милион во неделата што заврши на 27 јули, покажаа податоците.
