Мукаетов: ЕСГ веќе не е избор, туку чекор кон поголема конкурентност

„За компаниите во земјава и регионот, примената на ЕСГ-принципите повеќе не е избор – тоа е стратешки чекор кон одржлив раст и поголема конкурентност на глобалниот пазар“, истакна во својот воведен говор генералниот директор и претседател на УО на „Алкалоид“, Живко Мукаетов на регионалната ЕСГ конференција која се одржа под мотото „Градење отпорност во свет што се менува“.

Конференцијата беше организирана од Американските стопански комори (АмЧам) од Македонија и Србија, во соработка со АмЧам Албанија и Косово, а со поддршка од Европската банка за обнова и развој (ЕБОР) и кофинансирање од Европската унија.

Со оваа конференција, АмЧам заедницата од четирите земји ја поставува основата за понатамошна регионална соработка во областа на EСГ и придонесува кон зајакнување на долгорочната конкурентност на Западен Балкан, преку споделување добри практики и заеднички пристапи кон одржливото управување.

Себастијан Данет од Програмата за животна средина на ОН (UNEP) истакна дека компаниите можат да ги проценат и управуваат еколошките ризици, да го интегрираат биодиверзитетот во своите стратегии и да придонесат за обновување на екосистемите како дел од својата долгорочна вредност.

Дејан Валентинчиќ од Американско-словенечката образовна фондација се осврна на одливот на човечки капитал од регионот и потенцираше дека компаниите мора проактивно да ги адресираат социјалните последици преку одговорни HR-стратегии и инвестирање во луѓето.

Катја Бехтел, советник за деловен интегритет, нагласи дека борбата против корупцијата, транспарентноста и етичкото лидерство се клучни за зајакнување на довербата на инвеститорите и намалување на ризиците во сложениот геополитички контекст.