Инвестиција подобра од злато – на секои пет години нејзината вредност се удвојува

Ако некогаш сте посакале луксузни торби од брендови како „Шанел“, „Диор“ или „Хермес“, но по цени кои важеле пред инфлацијата — овие денови на „Вестијер Колектив“ имате можност да го доживеете токму тоа.

Од 4 до 6 септември, платформата за половна мода спроведува кампања наречена „Vintage Pieces at Vintage Prices“ (Винтиџ парчиња по витниџ цена), во која најбараните модели од осумдесеттите, деведесеттите и двеилјадитите се продаваат по износите од времето кога биле лансирани. Тоа е кратко враќање во ера кога луксузот беше значително подостапен, а акцијата веќе предизвика голем интерес кај купувачите и инвеститорите.

Примерите најдобро ја покажуваат разликата: „Шанел тајмлес“, лансирана во 1983 за околу 989 евра, денес во продавниците надминува 10.235 евра, додека на „Вестијер“ во оваа акција може да се купи за околу 2500 евра.

„Диор Седл“, ѕвезда на 2000-тите, првично чинела 1196 евра, денес достигнува речиси 3876, додека винтиџ верзија се нуди за нешто над 1000 евра, а за никогаш носен примерок доволно е околу 1029 евра.

„Фенди Багет“, икона на доцните 90-ти, лансирана за 1196 евра, денес се продава за 2944. На „Вестијер“ винтиџ верзиите започнуваат од 765 евра — заштеда од 74 отсто во однос на новите модели.

„Луи Витон спиди 30“, кој во 1985 чинел околу 265 евра, денес во продавниците чини 1645 евра, додека винтиџ примероци се достапни од 443 евра.

„Гучи Џеки“, некогаш достапна за 230 евра, денес нова се продава за 3473, додека винтиџ верзиите остануваат значително поповолни и започнуваат од 805 евра.

„Хермес биркин 35“, најбараниот модел на пазарот, при лансирањето во 1984 чинел 1794 евра, денес надминува 10.350 евра, додека во оваа кампања на „Вестијер“ се продава за помалку од 6000 евра.

„Винтиџ не е само наследство, тоа е начин на изразување личност. Ги надминува трендовите бидејќи секој може да го најде својот стил, а реткоста на парчињата му дава дополнителна вредност“, изјави во интервју за „Блумберг Адрија“, Фани Моизан, коосновачка на „Вестијер“.

Чантата како инвестиција

Сѐ повеќе примери покажуваат дека луксузните чанти не се само моден додаток, туку и облик на вложување. „Хермес Биркин“ веќе со децении ја носи репутацијата не само како најпосакувана, туку и како најсигурна чанта во светот. Според списанието „Форчн“, вредноста на биркин торбата отприлика се удвојува на секои пет години, што ја прави подобра инвестиција од златото. Ограничената достапност и строгите правила за купување во продавниците на „Хермес“ само ја зголемуваат нејзината ексклузивност.

„Препордажната вредност на моделите биркин и кели во последните десет години го надмина златото. Побарувачката за половни модели е толку висока, делумно затоа што пазарот за препродажба им нуди на купувачите повеќе опции отколку самата продавница на „Хермес“, каде што е дозволена само една ‘quota bag’ годишно, и тоа без можност за избор на точен модел“, изјави за „Форчн“ Џејм Фајерштајн, основач на платформата „Опен лакшури“.

На платформи како „Вестијер Колектив“, ова го потврдуваат и рекордите. Имено, „Хермес Фобур Биркин“ чанта таму во 2022 година била продадена за 158.000 евра.

Vestiaire Collective

Пазар што расте побрзо од брзата мода

„Вестијер Колектив“ во 2024 година оствари продажба од 486 милиони американски долари, односно околу 450 милиони евра, што претставува раст од 15 до 20 проценти во однос на 2023 година. За 2025 се предвидува понатамошен раст од пет до десет проценти. Платформата е позната по својот „винтиџ филтер“, кој опфаќа повеќе од 255.000 парчиња, а понудата на винтиџ производи пораснала за 220 проценти во последните пет години.

Се проценува дека пазарот на половна мода вреди меѓу 100 и 120 милијарди долари, со предвиден годишен раст од 20 до 30 проценти, според истражување кое во 2022 година го спроведоа „Вестијер Колектив“ и „Бостон Консалтинг Груп“. Како што расте пазарот на употребени производи и како што со новите генерации значително се менуваат навиките на потрошувачите, од компанијата предвидуваат понатамошен раст на неговата вредност.

Според Фани Моизан, чантите сочинуваат само петтина од вкупната продажба на платформата, но генерираат најголема парична вредност. Најмногу се купува облека (38 проценти), потоа обувки (22 проценти), додека торбите се на 21 процент. Просечната вредност на кошничката се движи меѓу 300 и 350 евра.

„Како водечка глобална платформа за препродажба на луксузни брендови, сакаме да продолжиме да ја зајакнуваме нашата присутност во Европа, АПАК регионот и САД. Важно ни е да ја искористиме нашата положба за да имаме позитивно влијание врз модната индустрија и да ги обединиме другите учесници да ни се придружат во оваа одржлива и циркуларна револуција“, истакна Моизан.

Купувачите во регионот Адрија сѐ повеќе ги откриваат предностите на секонд хенд модата. Најбарани се торбите и обувките, а расте и интересот за луксузни брендови, бидејќи се перципираат како долгорочна вредност.

„Врз основа на интерни податоци, нашата заедница на купувачи во Хрватска и регионот Адрија покажува посебен интерес за брендови како „Хермес“, „Луј Витон“ и „Гучи“ “, изјави коосновачката на платформата.

Одржлив луксуз

„Сакаме да продолжиме да се фокусираме на нашиот технолошки сегмент и континуирано да го подобруваме корисничкото искуство“, рече Моизан, нагласувајќи го технолошкиот аспект. За неа, винтиџ не е само пазар, туку и форма на отпор кон културата на брзата мода. Со продолжување на животниот век на луксузните производи, се намалува притисокот врз индустријата, а купувачите добиваат пристап до оригинали кои со текот на времето добиваат на вредност.

На „Вестијер Колектив“, како што вели, јасно се гледа дека потрошувачите сѐ повеќе избираат автентичност.

Винтиџ торбите генерираат во просек 64 проценти повеќе „лајкови“ од современите модели. Тоа потврдува дека шармот на оригиналот го надминува привидот на новото.

Исто така, со продажба на постоечка облека, компанијата избегнува производство на нова. Како што објаснува Моизан, купувањето производи на „Вестијер Колектив“ има 90 проценти помал еколошки отпечаток во споредба со купување нови производи.

Vestiaire Collective

„Со едукација на нашата заедница, забрана на брзата мода и промовирање на промислено купување, 82 проценти од купувањата на „Вестијер Колектив“ заменуваат купување нови производи. За споредба, овој сооднос е само 39 проценти кај конкурентот „Винтед“, што покажува дека нивниот модел, иако циркуларен, сепак поттикнува прекумерна потрошувачка. Луѓето купуваат половни, но и нови парчиња“, истакнува Моизан.

Не секој купувач на винтиџ торба е инвеститор. Некој ќе купи „Шанел“ сако од љубов, некој „Лејди Диор“ затоа што му бил недостижен пред дваесет години. Сепак, бројките јасно покажуваат дека луксузните парчиња можат да станат и финансиска актива. Оној што во 1980-тите купил „Хермес кели“ торба за 2.000 евра, денес поседува предмет вреден 20.000 евра.

Акцијата на „Вестијер“ потсети на пошироката приказна. Модата не мора да биде потрошна стока со краток век, туку трајна вредност — естетска, емоционална и финансиска. А понекогаш, со малку среќа и знаење, и подобра инвестиција од златото.