Растот на цената на среброто создава проблеми на индустријата која најмногу го користи

Цените на златото и среброто продолжија да паѓаат оваа недела по краток период на смирување, додека сигналите за можно намалување на трговските тензии меѓу САД и Кина, како и очекувањата за нови потези од централните банки, ги охрабрија инвестициите во поризична актива.

Спот цената на златото моментално се движи околу 3.960 долари за унца, под психолошката граница од четири илјади долари, додека среброто се тргува околу 47,7 долари по неколку дена притисок на пазарот.

И покрај овој пад, цените и понатаму се блиску до историски високи нивоа кои во последните месеци силно ги оптоварија производителите на соларна опрема, најголемите индустриски потрошувачи на сребро. Среброто оваа година е меѓу најнестабилните суровини. Имено, во првите месеци од 2025 година неговата цена порасна за повеќе од четириесет проценти и достигна највисоки нивоа во последните десет години, што дополнително ги зголеми трошоците на соларната индустрија.

Среброто е сè поголем дел од производствените трошоци

Според анализата на „Блумберг НЕФ“ (БНЕФ), високите цени на среброто дополнително ги зголемиле трошоците за производство на соларни ќелии и модули во 2025 година. Металот сега сочинува околу 14 проценти од вкупните производствени трошоци за соларни модули, наспроти пет проценти пред две години.

Речиси сите дополнителни трошоци се префрлени на производителите на ќелии и модули, кои веќе се борат со прекумерна понуда и пад на пазарните цени.

Цените на соларните ќелии благо пораснаа од јули, но тоа не беше доволно за да се покрие растот на влезните трошоци. Растот на цената на среброто практично ги избриша сите заштеди што производителите ги постигнаа во првата половина од годината.

Соларниот сектор троши најмногу сребро во светот

Соларната индустрија и понатаму е најголемиот поединечен потрошувач на сребро на глобално ниво. Според проценките на БНЕФ, за инсталациите планирани во 2025 година ќе бидат потребни околу 194 милиони унци (повеќе од 6.000 тони) сребро.

Иако се очекува раст од 15 проценти на новите соларни капацитети, побарувачката за сребро во индустријата оваа година ќе опадне за околу седум проценти, бидејќи производителите користат сè помалку метал по произведена единица.

Според „Силвер институтот“, соларната индустрија оваа година ќе сочинува околу 17 проценти од вкупната светска побарувачка за сребро, што е намалување во однос на ланските 21 отсто.

 

 

Барање алтеранативи

Бидејќи среброто моментално претставува повеќе од половина од готовинските трошоци за производство на  соларни ќелии, производителите забрзано бараат начини за намалување на потрошувачката. Се оптимизира процесот на метализација, сребрените прачки и контактите на ќелиите стануваат сè потенки, а индустријата преминува на модули без класични прачки (т.н. 0BB технологија), кои ја намалуваат потрошувачката на сребро за 10 до 30 проценти.

Истовремено, се истражуваат алтернативи како прашок од бакар обложен со сребро, кој веќе се користи во хетероспојни (HJT) ќелии. Целта е да се задржат перформансите, но да се намали уделот на сребро во пастите од 30 на 10 проценти. Сепак, целосната замена на металот не е блиску: бакарот е технички посложен, склон кон оксидација и бара дополнителни материјали за заштита, што ги зголемува трошоците и ја отежнува комерцијализацијата.

Bloomberg

Високата цена останува и по корекцијата

Иако цените на металите делумно закрепнаа на средината на неделата, нестабилноста останува висока, а аналитичарите предупредуваат дека трошоците за индустријата и понатаму се неприфатливо високи. Техничката корекција по повеќемесечниот раст повеќе ги ублажи краткорочните шпекулации отколку што го измени основниот тренд.

„Растот на цените на благородните метали е поттикнат од геополитичка неизвесност и трговските тензии, а не од реалната побарувачка“, наведуваат аналитичарите на „Стандард чартед“. Таквата динамика го става соларниот сектор во непријатна позиција — меѓу притисокот од растечките трошоци и ниските пазарни цени.

Додека инвеститорите и понатаму бараат засолниште во злато и сребро, производителите на соларни ќелии се соочуваат со парадокс: металот кој овозможува производство на чиста енергија станува сè поскапа пречка за нејзината исплатливост.