Побарувачката за акции на „Спејс екс“ четири пати поголема од понудата во ИПО-то

Првичната јавна понуда на „Спејс екс“ (SpaceX) привлекла побарувачка за над четири пати повеќе од достапните акции, според луѓе запознаени со ова прашање, пред компанијата за ракети, сателити и вештачка интелигенција предводена од Илон Маск да престане да прима нарачки.

Се очекувало банките да престанат да примаат нарачки од институционални инвеститори откако пазарот ќе се затвори во Њујорк во средата во 16 часот, изјавија луѓе запознаени со ова прашање.

Првичната јавна понуда на „Спејс екс“ треба да започне на 11 јуни и да се тргува следниот ден. Компанијата нуди 555,6 милиони акции по фиксна цена од 135 долари секоја, што би собрало околу 75 милијарди долари и би ја вреднувало на околу 1,8 билиони долари.

 

Нарачките вчера сè уште се примале и деталите би можеле да се променат, рекоа луѓето, барајќи да не бидат идентификувани бидејќи информациите не се јавни. Претставник на „Спејс екс“ не одговори веднаш на барањето за коментар.

Се очекува ИПО-то да се рангира како најголемо досега, надминувајќи го дебито на „Сауди Арамко“ од 29,4 милијарди долари во 2019 година. „Опен еј-ај“ (OpenAI), чии модели на вештачка интелигенција се натпреваруваат со оние од „Екс еј-ај“ (xAI) бизнисот на „Спејс екс“доверливо поднесе барање за котација во понеделникот, по „Антропик“ (Anthropic PBC) минатата недела. Заедно со „Спејс екс“, трите компании би можеле да додадат 3,6 билиони долари пазарна вредност на американските берзи, според пресметките на „Блумберг“.

„Голдман Сакс“ (Goldman Sachs Group Inc), „Морган Стенли“ (Morgan Stanley), „Банка на Америка“ (Bank of America Corp), „Ситигруп“ (Citigroup Inc) и „ЏП Морган“ (JPMorgan Chase & Co) го водат договорот, а учествуваат уште 18 банки. Акциите на компанијата, која формално е позната како „Спејс Експлорејшн Технолоџис Корп“ (Space Exploration Technologies Corp), ќе се тргуваат на Насдак (Nasdaq) и Насдак Тексас (Nasdaq Texas) под симболот SPCX.