Богатите млади Американци ја губат вербата во берзата како основно средство за создавање богатство и сè повеќе се насочуваат кон алтернативни инвестиции за да ја финансираат својата иднина, покажува истражувањето на Банката на Америка (Bank of America - BofA).
Поединци на возраст од 21 до 42 години со средства од најмалку три милиони долари имаат само една четвртина од нивните портфолија во акции, во споредба со повеќе од половина колку што имаат постари лица, според студија објавена во вторникот.
Менаџерите традиционално им препорачуваат на младите луѓе да имаат поголема изложеност на берзата, бидејќи пред нив е подолг период за инвестирање. Тоа историски функционираше, при што референтниот индекс S&P 500 објави годишен просечен принос од скоро 12 отсто од неговиот почеток во 1957 година до крајот на 2021 година. Сепак, од почетокот на годинава индексот падна за 24 проценти во услови на турбулентни пазари и зголемена инфлација.
Недостигот на верба во акциите покажува дека помладите генерации сè повеќе мислат дека традиционалното портфолио на акции и обврзници нема да испорача натпросечни приноси со текот на времето, вели во интервју Џеф Бускони, главен оперативен директор во Bank of America Private Bank. „Имавме многу силни перформанси на берзата во последната деценија и сега живееме во нестабилни времиња. Тоа е врежано во свеста на луѓето“, додава тој.
Наместо тоа, младите богаташи гледаат поголем потенцијал во средствата како криптовалути, недвижен имот и приватен капитал. Студијата на Bank of America, во која биле анкетирани 1.052 луѓе со инвестициски средства од повеќе од три милиони долари, покажува дека младите распределуваат 15 отсто од своите портфолија на дигитални валути, во споредба со само два отсто од постарите испитаници.
„Тоа е нешто што го набљудуваме, но изложеноста на криптовалути е сè уште релативно ниска кај нашите клиенти“, посочува Бускони.
Генерацијата на бејби-бумери (луѓе родени од '46 до '64) ќе пренесе околу 84 илјади милијарди долари од своето богатство на генерацијата X и милениумците од сега до 2045 година, според истражувањето на пазарот на Cerulli Associates. Се предвидува дека најголем дел од тие пари ќе одат за наследниците, додека околу 15 проценти ќе бидат донирани во филантропија.
Се очекува помладата група да дава преку структурирани фондови, како што се фондови со совет од донатори или DAF, што се добротворни инвестициски сметки кои однапред нудат даночни поволности без краен рок за тоа кога средствата мора да се распределат. Оние со имот од над 10 милиони долари имаат поголема веројатност да користат DAF отколку оние со 3 до 5 милиони долари.
Донаторските средства можат да бидат неверојатно ефикасен начин да се структурира филантропска стратегија, вели Бускони.
.webp){kind=icon}
