Нов пад на акциите поради загриженоста за инфлацијата и можната рецесија

Европските акции паднаа, а американските ја намалија добивката поради загриженоста околу влошувањето на инфлацијата и претстојната рецесија. Тоа се одрази и на силината на финансиските извештаи на компаниите на стартот на сезоната на објава на податоците за заработка.

Индексот „Stoxx Europe 600“ падна за 0,4 отсто, а најмногу за тоа влијаат рударскиот и секторот на недвижнини. „S&P 500“ падна за дури 1,1 отсто, додека „Nasdaq 100“ ја одржува стабилната вредност. Акциите на „Netflix Inc“ малку заздравеа по известувањето дека пораснал бројот на претплатници.

Фунтата падна по објавата на податоците дека инфлацијата во Велика Британија расте побргу отколку што очекуваа економистите. Слабеењето на вредноста на фунтата е резултат на тоа што скоковите на цените на храната во Обединетото Кралство ја вратија инфлацијата на двоцифрено ниво во септември, достигнувајќи најголем процент во последните 40 години, односно 10,1 отсто. Тоа го зголеми притисокот врз британската централна банка и владата на Лиз Трас за да делуваат бргу. Приносот од 10-годишните државни обврзници на Обединетото Кралство порасна.

Инаку, генерално, приносите на државните обврзници се држат близу до повеќегодишното највисоко ниво пред објавата на податоците за недвижнини во САД за септември. Приносот на 10-годишните обврзници порасна на 4,07 отсто, а доларот зајакна.

Акциите во азиско-пацифичкиот регион паднаа. Во Јапонија властите продолжија со контролата и проверките на вредноста на јенот, а министерот за финансии рече дека го зачестуваат следењето на девизниот пазар. Валутата во моментов се движи над нивото од 149 долари.

Оптимистичните резултати на компаниите, пониските проценки на вредноста и пресвртот во политиката на Обединетото Кралство ги зголемија апетитите за ризик во последните недели. Во исто време инвеститорите ги следат и знаците на слабост на светската економија и влијанието на постојаната инфлација на монетарните политики на американските Федерални резерви (ФЕД) и другите централни банки во странство.

Тери Сендвен, главен стратег за капитал во „US Bank Wealth Management“, предупреди дека и натаму постојат предизвици за пазарот на капитал. „Проекциите за заработка и натаму се изложени на корекции во надолна линија од страна на аналитичарите. Инфлаторните трендови, острите коментари од ФЕД и бавното темпо на раст на заработката во 2023 година се клучни фактори кои влијаат на расположението на инвеститорите и цените на акциите“, вели Сендвен.