Не запира падот на акциите поради стравот од рецесија

Вчерашниот беше уште еден ден на пад на акциите, додека приносите од државните обврзници пораснаа во услови на остри критики од надлежните од ФЕД кои најавуваат највисока каматна стапка од 5 проценти во 2023 година.

Фунтата падна откако Лиз Трас поднесе оставка од позицијата британска премиерка. Внимателноста околу економските предизвици беше толку изразена, што не е потребно многу да се види дека „S&P 500“ падна за најмалку 1 процент откако претходно во текот на денот објави раст од ист размер. Таквата состојба на пресврт од иста големина од плус во минус во рамки на еднодневно тргување годинава се случи по 16-ти пат, што е најмногу во било која година до сега од финансиска криза.

 

 

Индексот „S&P 500“ падна за 0,8 проценти, додека „Nasdaq“ и „Dow Jones“ минаа со нешто полесни последици при последната сесија на тргување и нивните загуби изнесуваа 0,5 односно 0,3 проценти од вредноста.

Несигурноста не покажува знаци на опаѓање. На крајот од тргувањето „Snap Inc“ вртоглаво падна откако извести за најбавниот тримесечен раст на продажбата од било кога, велејќи дека падот на потрошувачката за огласување на платформата продолжува да влијае на резултатите.

Напредокот на технолошките акции бргу пропадна откако шефот на ФЕД-Филаделфија, Патрик Херкер, рече дека креаторите на монетарната политика оваа година веројатно ќе ја покачат каматната стапка значајно повеќе од 4 проценти и ќе се држат до рестриктивната политика, оставајќи отворена врата да се стори нешто повеќе ако е потребно. Моменталната референтна вредност е меѓу 3 и 3,25 проценти, а банкарите сметаат дека каматите мора да продолжат да растат за да се стави инфлацијата под контрола.

„Акциите уште не излегоа од шумата на некоја чистинка“, велат пазарните аналитичари на „City Index“ и „Forex.com“. „Стравот од натамошно заострување на политиката на централните банки во услови на висока инфлација и низок раст значи дека инвеститорите ќе избегнуваат купување акции. Дури и на ова релативно евтино ниво“, додаваат аналитичарите.

Различни се финансиските резултати на пазарот, од разочарувачката продажба на „Tesle Inc“ до надминување на прогнозите на „International Business Machines Corp“. Но, не е дека немаше предупредувања за економските движења од страна на корпоративниот сектор. „Alcoa Corp“, американскиот алуминиумски гигант, е со тримесечна загуба од 60 милиони долари што укажува на влошено опкружување за компанијата која неодамна рече дека е под притисок од зголемените трошоци и падот на цената на алуминиумот. А, тоа претставува показател за здравјето и на неколку други клучни сектори, како градежништвото, воздухопловството и потрошувачката амбалажа.

Ниту најновите статистички податоци не нудат многу охрабрување, особено тие кои покажуваат пад на американските недвижнини веќе осми месец по ред, што значи дека скоковите на стапката за хипотекарни кредити на некој начин го казнува пазарот на недвижнини. Низата на пад во овој сектор е најдолга од 2007 година, кога тој пазар колабираше и ја повлече светската економија во голема рецесија.