.webp){kind=icon}
Откако акциите прво паднаа, подоцна во текот на тргувањето вратија малку од својата вредност, поттикнати од податоците што покажуваат солиден американски пазар на трудот. Таквите статистички резултати ги зголемуваат очекувањата дека Федералните резерви (ФЕД) може да останат агресивни во своето дејствување, дури и под закана со тоа да придонесат за рецесија.
Во време кога добрите вести се сметаат за лоши, индексот S&P 500 ги избриша претходните добивки, бидејќи најновите статистички податоци покажуваат скок на бројот на отворени работни места во САД, што може да го задржи притисокот на ФЕД. Откако го забележа својот најдобар месец во последните 46 години, индексот Dow Jones Industrial Average се тргуваше на значајно ниско ниво, од кое претходно неколкупати се обидуваше да се издигне.
Bloomberg Mercury
Индексот S&P 500 загуби 0,4 отсто од вредноста, Nasdaq 100 е во минус од еден отсто, а Dow Jones Industrial Average падна за 0,3 проценти.
По 26-ти пат годинава се случи индексот да се движи од добивка во загуба од најмалку еден отсто за време на една сесија. Тоа е најмногу во која било година од финансиската криза досега.
Големата технологија повторно ги притисна акциите, па тие на „Епл“ паднаа речиси за два отсто, а тие на „Амазон“ го достигнаа најниското ниво од 2020 година. Акциите на „Мета платформс“, пак, пораснаа.
Приносите од двегодишните американски обврзници, кои се чувствителни на потезите од ФЕД, пораснаа.
„И покрај другите знаци за забавување на економијата, податоците за слободни работни места, заедно со платите, покажуваат дека ФЕД е далеку од точката на која може да прогласи победа над инфлацијата и да ја тргне ногата од економската кочница“, вели Роналд Темпл, раководител во одделот за американски акции во „Лезард асет менаџмент“ (Lazard Asset Management).
Се предвидува дека американските работодавци додале околу 196.000 работници на своите платни листи во октомври. Економистите очекуваат дека стапката на невработеност ќе порасне до 3,6 отсто, а просечната плата за работен час ќе забележи уште еден солиден напредок.
На расположението на пазарот влијае и извештајот што покажува дека американското индустриско производство се приближува до стагнација во октомври, бидејќи нарачките се намалија по четврти пат во последните пет месеци, а индексот на цени падна на најниско ниво во повеќе од две години. Бројките дополнително ја поттикнаа загриженоста од рецесија, бидејќи централните банки ја зголемуваат борбата против инфлацијата.
„Со оглед на тоа дека уште не го достигнавме врвот на зголемувањето на каматите од страна на ФЕД, малку е веројатно дека веќе сме го допреле дното на овој мечкин пазар“, вели Сим Шах, глобален стратег во компанијата „Принсипал асет менаџмент“ (Principal Asset Management). Таа проценува дека пазарниот праг за овој циклус најверојатно ќе биде достигнат во првото или второто тримесечје следната година.
Лорен Гудвин, пак, од „Њујорк лајф инвестментс“ (New York Life Investments) верува дека ФЕД наскоро ќе паузира со зголемувањето на каматните стапки, дури и додека уште се наоѓаме во силна инфлација.
Инаку, пазарите се под влијание и од шпекулациите што се проширија дека Кина се подготвува за постепено напуштање на политиката за нулта ковид, што помогна за зајакнување на акциите. Индексот од Хонгконг порасна речиси за седум проценти. Но акциите ја намалија добивката откако портпаролот на кинеското министерство за надворешни работи рече дека тие не се известени за укинување на политиката.
