Азиските берзански индекси и доларот ја почнаа неделата во позитива

Азиските акции пораснаа додека доларот напредуваше во својата привлечност како прибежиште среде поделените пазарни очекувања за прогнозите дека Кина може да го ублажи својот став за политиката за нулта ковид. Акциите во Хонгконг пораснаа, бргу правејќи пресврт од почетниот пад.

Индексите пораснаа низ Азија, ставајќи го индексот MSCI Asia Pacific на највисоко ниво во последниот месец. Сликата на валутниот пазар беше поинаква, каде што зелената банкнота зајакна во однос на поголемиот дел од главните трговски валути.

Индексите ја влечат позитивата уште од петокот, кога S&P 500 заклучи со добивка од 1,4 отсто, додека Nasdaq 100  порасна за 1,6 процент. И поголемите азиски индекси петокот го завршија во зелената зона меѓу еден и 2,7 отсто.

Австралискиот и новозеландскиот долар забележаа најголем пад, со оглед на нивната чувствителност на прогнозите за кинескиот економски раст. И јуанот ослабна.

Фјучерсите за американските и европските акции ги намалија добивките, додека нафтата и златото исто така се во црвената зона, но над својата најниска вредност за сесијата на тргување.

Довербата, исто така, ослабна откако „Епл“ рече дека очекува оваа година да произведе минимум три милиони ајфони 14 помалку од првичните планови. Пазарот и натаму е турбулентен поради тоа што трговците се колебаат меѓу надежта дека Кина повторно ќе се отвори и стравот дека острите ограничувања од ковид ќе потраат. Кинеските власти во саботата ветија дека ќе останат „непоколебливо“ строги во пристапот на Пекинг за сузбивање на вирусот. Токму поради тоа националните акции агресивно паднаа во петокот.

„Расположението во врска со кинеските акции толку е ниско, што секој потенцијален катализатор ги поттикнува. Ако ги погледнете акциите што имаа корист, ќе видите дека тоа се акции на технолошките компании со голема капитализација и не сум изненаден поради тоа“, рече Дејвид Чао, глобален извршен стратег за азиско-пацифичкиот пазар во „Инвеско“ (Invesco Ltd.).

Расправата за прогнозите за Кина доаѓа истовремено додека инвеститорите се борат со ветриштата поради зголемувањето на каматната стапка од страна на американските Федерални резерви (ФЕД). Податоците од САД од петокот покажуваат силно зголемување на вработувањето и платите, заедно со зголемена невработеност. Тоа понуди мешана слика за банкарите од ФЕД, кои разговараа за тоа колку долго да ја продолжат својата кампања за зауздување на зголемената инфлација.

„Во текот на следните три-четири месеци доларот ќе продолжи да расте. Тоа навистина е во согласност со неодамнешниот состанок на ФЕД, на кој банкарите рекоа дека ќе го забават темпото, но ќе продолжат со зголемување на каматите“, рече Махјабен Заман, раководител за истражувања во Банкарската групација на Австралија и Нов Зеланд (Australia & New Zealand Banking Group Ltd/), во своето гостување на Блумберг ТВ.

Приносите од двегодишните американски обврзници, кои се чувствителни на непосредните политички потези, пораснаа денеска, додека десетгодишните приноси се променливи. Пазарот ги очекува најновите податоци за инфлацијата во САД, кои треба да бидат објавени в четврток, откако базичниот индекс на потрошувачки цени во септември порасна повеќе од предвидувањата и е на највисоко ниво во последните 40 години. Дури и ако цените почнат да паѓаат, индексот на потрошувачките цени е далеку над зоната на удобност на ФЕД.