Неочекувано закрепнување на најризичните државни обврзници

Најризичните суверени обврзници во светот имаат моментум откако инвеститорите на Вол Стрит одлучија да бараат високи приноси од земјите кои покажуваат рани знаци  на пазарно-пријателско ориентирање. Државните доларски обврзници со низок рејтинг на Ел Салвадор, Нигерија и Турција се подобрија овој месец бидејќи менаџерите на пари преземаат ризични облози во замена за големи приноси. Прашањето сега е дали ортодоксните политики можат да продолжат да привлекуваат капитал додека големите централни банки ја повторуваат својата посветеност да ја намалат инфлацијата.

„Сè уште има значителен простор овие средства да се соберат“, рече Тис Лоу, портфолио менаџер во „Најнти Уан УК Лтд“ (Ninety One UK Ltd.), мислејќи на суверените високо-приносни обврзници. „Но, следната фаза од релито веројатно ќе биде поостра бидејќи сè уште постои неизвесност во однос на тоа како ризичните средства ќе се справат со континуираното стегање на глобалната ликвидност“.

Средствата на пазарите во развој се мачеа да се прикачат на прогнозите на аналитичарите за 2023 година, бидејќи кинеското економско закрепнување ја загуби моќта и главните креатори на политики ги задржаа каматните стапки високи. Бројот на новите владини неплаќања, во меѓувреме, достигна рекорд - што резултира со силни напори да се забрза процесот на реструктуирање на државните долгови.

Тоа е она што ги издвојува високите перформанси на високоризичните обврзници во текот на овој месец. Долгот со висок принос од пазарите во развој се врати за речиси три проценти во јуни, а најголемите добивки доаѓаат од високо шпекулативните земји оценети со рејтинг CCC. Во меѓувреме, нациите кои имаат инвестициско ниво се малку променети овој месец.

„Ориентирањето кон поортодоксни и пазарно пријателски политики го поттикнаа неодамнешното надминување на перформансите на суверените обврзници од Турција до Нигерија“, рече Брендан Мекена, стратег во „Велс и Фарго“ (Wells Fargo & Co.) во Њујорк. „Ова е тренд што може да продолжи на пазарите во развој и понатаму“.

Суверените банкноти на Нигерија се издигнаа кога претседателот Бола Тинубу презеде серија храбри фискални потези со кои ја ослободи вредноста валутата на земјата и го урна скапиот децениски систем на субвенции за гориво.

Следеше рели на обврзници и во Турција откако новоизбраниот турски претседател Реџеп Таип Ердоган донесе двајца поранешни банкари од Вол Стрит да ги водат финансиите на земјата, поттикнувајќи оптимизам за поортодоксен пристап.

Дури и серискиот неплаќач како Аргентина забележа напредок кај нејзините доларски обврзници во јуни, бидејќи инвеститорите се позиционираат за претстојните претседателски избори во земјата. Претседателот Алберто Фернандез ја отфрли можноста да се кандидира за реизбор во период кога инфлацијата е над 100 проценти, а владината каса е празна, отворајќи ја вратата за нова администрација со приоритети поволни за пазарот.

Во исто време, дебатата на Вол Стрит е се погласна за тоа како да се тргува со ризичните пазари во развој, бидејќи големите централни банки ја задржуваат својата определба за поостра монетарна политика. Федералните резерви и Европската централна банка ја сигнализираа потребата од натамошни зголемувања на каматните стапки за да се смири инфлацијата, повторно разгорувајќи ја загриженоста за ризикот за светската економија.

Според „Најнти Уан УК Лтд“  инвеститорите во средства на пазарите во развој со висок принос, најверојатно, ќе бараат докази дека може да се избегне длабока, болна рецесија.

Но, сè уште постои потенцијал за таканаречено меко приземјување во американската и глобалната економија, што треба да ги привлече тековите на капиталот на инвеститорите на пазарите во развој, според економистите Робин Брукс и Џонатан Фортун од Институтот за меѓународни финансии.

Ел Салвадор, на пример, имаше корист од пошироката промена во расположението за надворешниот ризик во текот на изминатите неколку недели, според Сиобхан Морден, управен директор во „Сантандер УС Капитал Маркетс“ (Santander US Capital Markets LLC.)

Мерење на ризиците

Се разбира, ризикот е вроден во овие инструменти. Многу од овие обврзници сè уште тргуваат на или блиску до нивоа што инвеститорите ги сметаат за потресни - и затоа се изложени на поголем ризик од евентуално неисполнување на обврските.

Обврзниците во долари од 16 пазари во развој сè уште тргуваат на високи нивоа односно најмалку 10 процентни поени над државните обврзници на САД, според податоците собрани од индексот на Блумберг.

Вредноста на доларските обврзници на Египет сè уште е намалена за приближно 10 проценти оваа година, дури и по јунското рели. Економијата на нацијата се бореше да се опорави од пандемијата и последиците од руската војна во Украина, дури и откако склучи договор со Меѓународниот монетарен фонд и ја девалвира локалната фунта.

Но, тоа не ја одвраќа Сонал Десаи, главен инвестициски директор за фиксен приход на „Френклин Темплетон“, кој ја наведе вредноста на обврзниците.

„Би забележала дека пограничните пазари секогаш ќе бидат со ризик“, рече таа. „Но, сепак наоѓаме атрактивни можности делумно затоа што некои од вреднувањата се толку екстремни“.