Во првите девет месеци од 2023 година, преку домашни овластени учесници реализиран е промет на странски пазари од 2,1 милијарди денари (34,2 милиони евра), којшто во споредба на истиот период од претходната година кога беше остварен промет од 3,1 милијарди денари (50,9 милиони евра), е понизок за 32,86 проценти, покажуваат податоци од извештајот на Комисијата за хартии од вредност за третиот квартал од годинава.
„Доколку се анализира прометот на учесниците кумулативно реализиран на странски пазари, наспрема реализираниот промет на домашниот пазар, може да се заклучи дека доминира тргувањето на домашниот пазар. Прометот реализиран на странски пазари во овој квартал учествува со 35 проценти од вкупниот промет и истиот е на пониско процентуално ниво во однос на третиот квартал од 2022 година, кога зафаќал учество од 42 проценти во вкупниот промет“, пишува во извештајот.
Од КХВ инфомираат дека во првите девет месеци од 2023 година продолжил трендот на тргување првенствено со акции. Овој тренд е присутен и во третиот квартал, иако може да се констатира дека е присутно и тргување со обврзници на странски пазари и тргување со помал интензитет со други хартии од вредност.
Во тргувањето на странски пазари во третиот квартал од 2023 година учествуваат четири банки и една брокерска куќа: „Шпаркасе Банка Македонија“ АД Скопје, „Комерцијална Банка“ АД Скопје, „НЛБ Банка“ АД Скопје, „Стопанска Банка“ АД Скопје и „Инвестброкер“ АД Скопје.
Во прометот реализиран на странски пазари во овој квартал најголемо учество има „Шпаркасе Банка“ која учествува со 40,39 проценти од вкупниот промет на странски пазари, по неа е „Комерцијална Банка“ со 29,81 проценти, трета по ред е „Стопанска Банка“ АД Скопје со 13,16 проценти, по неа следи „НЛБ Банка“, која зафаќа 12,37 проценти од прометот на странски пазари и со најмало учество е „Инвестброкер“ со учество од 4,27 проценти од прометот на странски пазари.
Доколку се анализираат овластените учесници поединечно во однос на тргувањето на домашниот пазар наспрема странките пазар, се забележува дека „Шпаркасе Банка“ АД Скопје во најголем дел е ориентирана на тргување на странските пазари.
„Оваа банка во третиот квартал од 2023 година, 91,65 проценти од својот промет го остварила на странски пазари. Овој тренд уште поизразен бил во третиот квартал од минатата година кога 98,83 проценти од промет е реализиран на странските пазари“, се наведува во извештајот.
„НЛБ Банка“ АД Скопје во третиот квартал од оваа година има реализирано поголем промет на странски пазари. Имено, оваа банка 57,8 проценти од прометот го реализирала на странските пазари, наспрема 42,2 проценти на домашниот пазар.
„Комерцијална Банка“ АД Скопје во овој квартал речиси воедначено тргува како на домашниот пазар така и на странските пазари. Па така, оваа банка 51,38 проценти остварила на домашниот пазар, наспрема 48,62 проценти на странските пазари.
Брокерската куќа „Инвестброкер“ АД Скопје во овој квартал поизразено била ориентирана на домашниот пазар. Таа 72,11 проценти реализирала на домашниот пазар, наспрема 27,89 проценти на странските пазари.
„Како последен овластен учесник кој започна со тргување на странски пазари е „Стопанска Банка“ АД Скопје. Оваа банка во третиот квартал првенствено била ориентирана спрема странските пазари и истата 63,79 проценти го реализирала на странските пазари“, се наведува во извештајот на КХВ.
.webp){kind=icon}
