.webp){kind=icon}
Европските акции во транспортниот и енергетскиот сектор пораснаа во петокот, откако САД и Велика Британија започнаа воздушни напади против јеменските Хути, што ги зголеми цените на нафтата и ги поттикна очекувањата дека цените на испораките ќе останат покачени.
Германската бродска компанија „Хапаг-Лојд“ (Hapag-Lloyd AG) забележа раст од дури 4,8 отсто, додека „Молер - Маерск“ (Moller - Maersk A/S) оствари добивка од 3,9 отсто, следејќи ги актуелните трендови на компаниите од азиските пазари. Европските нафтени гиганти како „Шел“ (Shell Plc) и „Тотал“ (TotalEnergies SE) напредуваа по повеќе од еден процент откако брент скокна над 79 долари за барел.
Акциите на европските транспортни компании растат од средината на ноември
Bloomberg
Акциите на компаниите што се занимаваат со транспорт се стремат да забележат добивка втор месец по ред поради очекувањата дека ќе се оди на долги заобиколувања во маршрутите (за да се избегнат нападите на бунтовниците во Црвено Море), па цените на товарот ќе се зголемат. Хутите почнаа да напаѓаат бродови кон средината на ноември, во знак на поддршка за Хамас, и ветија дека нема да отстапат додека Израел не престане со воената акција во Газа.
„Ефектите од бранот на зголемени геополитички тензии во Црвено Море ги поттикнуваат повисоките трошоци за испорака и ги влечат цените нагоре“, рече аналитичарот на „Блумберг интелиџенс“ Ли Класков.
Цените за големи пратки, вклучувајќи и суровини, се зголемија во просек за 75 проценти досега во 2024 година, потенцијално зголемувајќи ги приходите на шпедитерите, истакна Класков. Акциите на „Хапаг-Лојд“ пораснаа за речиси 20 отсто годинава, додека „Маерск“ порасна за околу девет отсто. Уште повеќе, според Класков, секторот и натаму се тргува по пониски цени од пошироките пазари.
Сепак, некои учесници на пазарот сметаат дека нарушувањата во Црвено Море се од привремен карактер.
„Имајќи го предвид тоа, не очекуваме трајно влијание врз инфлацијата или долгорочно поместување на заработката за логистичките и бродските компании“, рече Јоаким Клемент, стратег на „Либерум“ (Liberum).
