Ова е клучна недела за берзите - ќе бидат објавени многу податоци

Професионалците на Волстрит се соочуваат со клучна недела која најверојатно ќе го одреди тонот за остатокот од годината на пазарите и во економијата.

Најважниот настан е завршувањето на состанокот на Федералните резерви в среда. Иако не се очекува намалување на каматните стапки, трговците и инвеститорите внимателно ќе ги следат коментарите во потрага по насоки за идните чекори. Потоа следува серија извештаи за заработка од големите технолошки компании како „Амазон“, „Епл“, „Мета“ и „Мајкрософт“. И покрај сето тоа, ќе бидат објавени и неколку клучни економски индикатори, како бруто домашниот производ и вработеноста надвор од земјоделскиот сектор.

Со други зборови, ако некогаш постоела недела од пет дена што ќе ја дефинира втората половина од годината – ова е таа недела.

Bloomberg

„Оваа недела со густа агенда — трговски преговори, состанокот на Федералниот комитет за отворен пазар, извештајот за вработеност и четири од ’Величествените седум‘ што објавуваат резултати — ја прави вистински ’момент на вистината‘ за пазарите“, изјави Џулијан Емануел, главен стратег за акции и квантитативна анализа во „Еверкор“.

Овој бран на објави ќе ја стави на тест вербата на инвеститорите во отпорноста на американската економија и на изгледите за нејзиниот, навидум неприкосновен, раст на берзата. И со самонаметнатиот рок на претседателот Доналд Трамп за воведување нови царини на 1 август — за кој рече дека нема да се продолжи — пазарите се надеваат на барем некаква стабилност во трговските преговори по месеци на неизвесност.

„Мислам дека има поголеми шанси пазарите да добијат јасна слика за тоа дека економијата останува силна, додека помалку јасно ќе биде што ќе се случува на трговски план“, рече Кевин Гордон, виш инвестициски стратег во „Чарлс Шваб“. „Роковите за ’реципрочни царини‘ се различни за некои од нашите најголеми трговски партнери, а сè уште има неодговорени прашања околу веќе најавените трговски договори, па не гледам на 1 август како на некој волшебен датум по кој царинската неизвесност ќе заврши.“

Компаниите од S&P 500 воопшто гледано ги надминуваат очекувањата, а профитот е зголемен за 4,5 отсто во споредба со истиот период минатата година, според податоци од „Блумберг интелиџенс“. Компании како „Саутвест Ерлијанс“, која изјави дека царините и го намалиле годишниот профит пред оданочување за 1 милијарда долари, очекуваат подобрување во втората половина од годината. „Веќе гледаме знаци дека побарувачката се враќа во обем“, изјави извршниот директор Боб Џордан во интервју.

Голем дел од силата во резултатите доаѓа од побогатите клиенти. „Американ ерлајнс груп“ забележа зголемена побарувачка за места во првата класа, а „Декерс аутдор корпс“ се пофали со продажба на скапи обувки. „Јунајтед холдингс“ и „Делта ерлијанс“ известија дека деловното патување е главниот двигател на нивното закрепнување.

Од друга страна, „Чипотл мексикан грил“ го намали својот прогнозиран раст бидејќи „потрошувачите со пониски примања се под финансиски притисок“, изјави извршниот директор Скот Боатрајт, што довело до намалување на потрошувачката.

Постојат и други знаци на притисок — компании како „Конагра брендс“ и „Абот лаборатитис“ зборуваат за зголемени трошоци поради царини. Особено, акциите од потрошувачкиот дискреционен сектор се очекува да претрпат пад на профитот до почетокот на 2026 година, поради последиците од трговската политика, предупредуваат стратезите на „Блумберг интелиџенс“ Џина Мартин Адамс и Мајкл Каспер.

„Веќе слушаме некои корпоративни коментари за тоа какво влијание имаат царините на индивидуално ниво“, изјави Ден Гринхаус, главен економист и пазарен стратег во „Солус алтернатива сет менаџмент“. „Но вистината е дека ќе ни требаат уште неколку месеци за да добиеме појасна слика за тоа како се распределуваат трошоците.“

Економска неизвесност

Економските податоци исто така се непостојани, бидејќи ефектите од царините допрва ќе почнат да се чувствуваат. Првичната процена на владата за бруто домашниот производ (БДП) за вториот квартал се очекува да покаже значително закрепнување на растот, откако масовниот пораст на увозот предизвика пад на економијата на почетокот од годината.

„Сè додека пазарот и економијата не добијат можност да ги апсорбираат новите царински стапки што стапуваат на сила во петок, нема да знаеме точно каде се наоѓаме“. изјави Мајкл О’Рурк, главен пазарен стратег во „Џонс трејдинг“.

Други извештаи што ќе бидат објавени оваа недела може да укажат на мало забавување во економијата. Економистите очекуваат дека потрошувачката речиси и да не пораснала во јуни, ако се земе предвид инфлацијата, а други процени покажуваат продолжено намалување на вработувањето и благ пораст на невработеноста. Исто така, се предвидува и забрзување на инфлацискиот индикатор што го преферираат Федералните резерви — индексот на цените на лична потрошувачка — бидејќи царините почнуваат да влијаат.

„Ова не е економски пад од типот ’провалија‘, што обично сите го очекуваат, но е видливо забавување ако се потрудите да погледнете под површината и да ги анализирате деталите“. изјави Грегори Дако, главен економист во „Партенон“.

И покрај сета таа неизвесност, берзата тргува на рекордно високо ниво, бидејќи најлошите сценарија со царините досега не се остварија. Прашањето е колку долго тоа може да трае.

„Мислам дека тука има неколку фактори. Прво, има сигнали дека пазарот на труд се држи стабилно, платите растат побрзо од инфлацијата — и двете работи го поддржуваат просечниот потрошувач“. рече Кејла Седер, стратег за макро и мулти-активи во „Стејт стрит“. „Кога станува збор за берзата, заработките на компаниите ги надминуваат ниските очекувања, што покажува дека фирмите се справуваат подобро од стравувањата“.