Јужнокорејскиот бегалец До Квон - креаторот на неуспешниот криптопроект „Тераформ лабс“ (Terraform Labs), за кого неодамна беше објавено дека можеби е во Србија, наводно во земјата искеширал 9,64 биткоини, објавија во петокот странски медиуми, повикувајќи се на текстот на јужнокорејскиот портал „Диџитал асет“ (Digital Asset).
Имено, на тој сајт беше објавена информација за крипто-паричникот на Luna Foundation Guard (LFG) – непрофитна организација основана од Квон во Сингапур. Се наведува дека на 8 ноември 9,64 биткоини (во вредност од приближно 190.000 долари во тоа време) биле префрлени од паричникот на LFG во паричникот на криптоберзата „Бајненс“ (Binance) - што, се разбира, ја отвора можноста дека средствата на берзата потоа би можеле да бидат разменети за реални (фиат) пари.
Криптоматите не се опција за Квон
Прочитај повеќе
Кореец кој збриша крипто средства од 60 милијарди долари се крие во Србија?
Србија се наведува како можна локација на крипто-бегалецот До Квон, пропаднат 31-годишен јужнокорејски претприемач.
12.12.2022
2022-та ќе остане запаметена по пресвртот на криптопазарот
Криптокомпаниите почнаа да паѓаат како домино, па годинава ќе остане запаметена и како пресвртница на пазарите на криптовалути.
23.12.2022
Порталот имплицира дека токму такво нешто се случило и посочува дека е познато оти во Србија има криптомати. Сепак, единствените криптомати во Србија се во сопственост на крипто-менувачницата ECD, а за некој да повлече средства од нив, треба да биде нивен корисник. А како што вели основачот и извршен директор на оваа берза, Александар Матановиќ, Квон не е нивен корисник, ниту пак се обидел да стане.
„Покрај тоа, поради ограничените количини на трансакции на криптоматите, тој сигурно нема да може да ја продаде споменатата сума во криптовалути преку нашите криптомати“, додава тој.
Матановиќ вели и дека никој од Министерството за внатрешни работи и Амбасадата на Република Кореја не контактирал со нив во однос на ваквите информации.
Bloomberg
„Мислам дека не е ни реално некој што се крие од законот да користи услуги поврзани со дигитални средства кај некој што врши проверка на идентитетот на корисникот. Многу е поверојатно дека тој продава криптовалути наоѓајќи луѓе кои се спремни да купат од него за готовина, на дискретен начин, во живо, без да остават трага на некаков уред (како на пример, криптомат) или на некој сајт кој бара регистрација и проверка“, оценува нашиот соговорник.
Идентитетот и локацијата не може да се прочитаат од блокчејнот, властите молчат
Основачот на крипто-менувачницата објаснува дека физичката локација каде што некој искеширал криптовалути не може да се види на блокчејнот. „Ова бара дополнителни информации што не се наоѓаат на блокчејнот“.
Овде, вели тој, трансакциите се следат благодарение на тоа што споменатата адреса претходно била поврзана со него, па се претпоставува дека новите трансакции од таа адреса се иницирани од До Квон. Тоа не мора нужно да биде така, нагласува Матановиќ, иако секако е можно.
Во меѓувреме, српските власти не соопштуваат за случајот на Квон. Прашањата на „Блумберг Адрија“ до ресорното министерство и амбасадата засега остануваат неодговорени.
Србија нема билатерален договор за екстрадиција со Јужна Кореја, но двете земји пристапиле кон Европската конвенција за екстрадиција. Исто така, Србија е членка на Интерпол, кој, да потсетиме, на почетокот на есента распиша црвена потерница по Јужнокорејецот. Како што неодамна изјави за нашиот портал Марко Штамбук, адвокат и соработник на белградскиот Центар за човекови права, државата соодветно се обврзала на соработка со другите земји кои се дел од таа меѓународна организација.
Од друга страна, бегалецот би можел да се брани со молчење, како и да се спротивстави на екстрадицијата доколку смета дека не се исполнети сите законски услови.
И по загубите од милијарди долари, токенот е сè уште жив
До Квон е обвинет во неговата родна Јужна Кореја, меѓу другото, за кршење на законите за пазарот на капитал. Ова се случи откако неговиот систем заснован на алгоритамски поврзаните токени terraUSD (чија вредност требаше да биде стабилна) и luna (чија вредност требаше да се зголеми) пропадна во мај. Колапсот на пазарот збриша дигитални средства во вредност од 60 милијарди долари.
Depositphotos
Локацијата на пропаднатиот претприемач стана нејасна откако властите издадоа налог за негово апсење во средината на септември. Обвинителите во октомври тврдеа дека Квон одлетал за Дубаи, што се верува дека бил попатна станица по заминувањето од Сингапур, каде што се наоѓала „Тераформ лабс“. Засега не е познато и како би можел да стигне во Србија.
Патем, кога проектот падна, тера-заедницата одлучи да ги раздвои двата токена, односно да му пресуди на terraUSD: оригиналниот блокчејн Terra беше преименуван во Terra Classic и тој повеќе не вклучува стабилни токени, додека луна, кој падна близу до нула тој месец, е преименуван во luna classic со назнака LUNC.
LUNC е школски пример за неумоливиот оптимизам на крипто-заедницата - и покрај надолното расположение кај аналитичарите, некои инвеститори продолжија да го купуваат токенот дури и по падот.
.webp){kind=icon}
