Чувањето крипто е лукративен бизнис и Волстрит сака парче од колачот

Во традиционалниот инвестициски свет услугата за чување на средствата е многу здодевна, иако клучната работа: чувањето на акциите и обврзниците на клиентите на безбедно, т.н. старателска услуга, е горе-долу едноставна работа.

Сепак, на пазарот на криптовалути вреден околу 2 трилиони долари, кој е пак омилена „занимација“ за хакери и измамници, старателските услуги се сè, само не здодевна тема. Како резултат на тоа, овие услуги чинат и до десет пати повеќе од заштитата на традиционалните средства како хартии од вредност и готовина, вели Хедли Стерн, главен комерцијален директор на „Маринејд“ (Marinade), алатката за старателски услуги на криптоплатформата „Солана“ (Solana). Затоа, оваа област е потенцијално атрактивна за раст на стартапи, како и за банките на Волстрит и други фирми што бараат начини да се прошират во секторот на дигитални средства.

Криптоберзите,  како што се „Коинбејс глобал“ (Coinbase Global Inc). и „Битгоу“ (BitGo Inc.) беа меѓу доминантните даватели на вакви услуги досега, заедно со традиционалните финансиски компании, главно преку модел на холдинг поради регулаторната несигурност што ги опкружува дигиталните средства. Иако сега старателските услуги за криптосредства се пазар вреден околу 300 милиони долари, бизнисот станува сѐ попримамлив, со учесници како што е „Фајрблокс“ (Fireblocks Inc.), и се проценува дека секторот ќе расте со стапка од околу 30 проценти годишно.

„Новите учесници би се обложиле  дека овој пазар станува значително поголем“, вели Кемпбел Харви, професор по финансии на универзитетот „Дјук“.

„Би-ен-уај“ (BNY), „Стејт стрит“ (State Street Corp.) и „Ситигруп“ (Citigroup Inc.), некои од најголемите банки за старателски услуги во светот, направија првични обиди во чувањето крипто или, пак, изразија интерес.

Старателските услуги се контроверзни уште од најраните денови на криптовалутите, кога многу учесници се придржуваа до изразот „немате клуч, немате монети (coins)“. Терминот произлезе од фактот дека само оние што поседуваа шифрирани клучеви за отворање на дигиталните паричници, всушност, реално ги контролираа средствата. 

Bloomberg

И додека фирмите за старателски услуги  помогнаа да се намали ризикот од кражба и хакирање, сепак грешките во чекори продолжија. Само овој месец брокерската куќа специјализирана за мали индивидуални клиенти „Робинхуд маркетс“ (Robinhood Markets Inc.) и инвестициската фирма „Галоа капитал“ (Galois Capital) постигнаа спогодби со американските регулатори (читај: платија казни, н.з.), во еден дел и поради грешки поврзани со чување криптосредства. Од „Робинхуд“ изјавија дека оттогаш ги поправиле работите.

„И двата случаи истакнуваат колку е важно квалификуваното старателство за институционалните инвеститори“, рече Тим Огилви, глобален раководител за институционални клиенти при криптоберзата „Кракен“ (Kraken), која исто така нуди старателски услуги.

Досега обидите на Волстрит во оваа насока беа само повремени. „Би-ен-уај“ ја претстави својата инфраструктура за чување дигитални средства во 2022 година, но допрва треба да го разработи концептот. Во 2023 година „Насдак“ (Nasdaq Inc). ги стопира своите обиди за чување крипто.

Сепак, компаниите продолжуваат со обидите, со многу планови што се вртат околу заштита на токенизираните средства. „ЏП Морган“ (JPMorgan Chase & Co.) води проект наречен „Оникс“ (Onyx), кој овозможува блокчејн плаќања меѓу клиентите на банката, на пример. Минатиот декември „Депозитори траст енд клиринг“ (Depository Trust & Clearing Corp.) ја презеде компанијата „Секјуренси“ (Seccurency) за да обезбеди производи за токенизирани традиционални финансиски средства. Во август годинава, пак, „Стејт стрит“ го избра провајдерот „Таурус“ (Taurus) за токенизација и чување  дигитални средства.

„Ова партнерство ќе ни обезбеди технолошка основа да понудиме услуги за чување дигитални средства, услуга што сега е предмет на регулаторно одобрување, штом регулаторната клима, особено во САД, ќе стане поповолна“, рече Дона Милрод, раководител на одделот за решенија за дигитални средства во „Стејт стрит“.

Еден голем проблем што ги попречува етаблираните учесници на финансискиот пазар е правилото на Комисијата за хартии (КХВ) од вредност на САД, познато како „САБ 121“ (SAB 121), што го прави всушност непрактичен обидот на високо регулираните финансиски фирми да нудат чување криптосредства. Претседателот Џо Бајден стави вето на напорите на Конгресот да го поништи ова правило, а неколку банки добија исклучоци од него.

Bloomberg

Во говорот од 9 септември, официјален претставник на КХВ истакна конкретни примери кога персоналот на Комисијата дозволил субјектите да не се придржуваат до „САБ 121“ и објасни зошто. Сепак, другите што се борат да добијат исклучоци ги чекаат резултатите од претседателските избори во САД за да видат дали Доналд Трамп ќе се врати во Белата куќа и ќе го исполни своето ветување да го замени претседателот на КХВ, Гери Генслер, со регулатор што целосно ќе ја отвори вратата за криптосредствата.

„Иако КХВ почна да обезбедува олеснувања од ‘САБ 121’ за банките, тоа не го направи на транспарентен начин што се применува насекаде“, рече Дејвид Портила, партнер во „Дејвис Полк енд Вардвел ЛЛП“ (Davis Polk & Wardwell LLP), адвокатска фирма што ги застапува банкарските и криптоклиентите. „Технолошките, правните и регулаторните ризици наведени во ‘САБ 121’ се значително ублажени со постојната и обемна законска и супервизорска рамка што се однесува на банкарските организации, но сепак политиката на КХВ не го одразува тоа“.

Дури и провајдерите отаде Атлантикот прават планови за во случај на евентуална регулаторна промена. По воздржувањето минатата година, лондонската компанија „Копер“ (Copper) размислува за нов фокус на американскиот пазар доколку победи Трамп.

„Едноставно, во зависност од исходот на изборите, тоа може да се случи побрзо или побавно“, изјави Боби Загота, главен извршен директор на криптоберзата „Битстепм УСА“ (Bitstamp USA), која користи „Битгоу“ за чување крипто. „Главните играчи на Волстрит нема да ја пропуштат шансата, особено ако тоа сигнализира еволуција на традиционалниот пазар на услуги“.