text size
Доларот може да се соочи со лавина од продажби „тешка“ 2,5 трилиони долари, бидејќи азиските земји ги растоваруваат своите резерви од светската резервна валута, вели аналитичарот Стивен Џен.
Азиските извозници и инвеститори можеби со години акумулирале „исклучително големи“ резерви од долари, што го зголемило трговскиот суфицит на регионот со САД, напишаа Џен и Џоана Фреире од СЛЏ (Eurizon SLJ Capital) во белешка во средата. Како што се продлабочува трговската војна предводена од САД, некои азиски инвеститори можеби ќе почнат да враќаат дел од средствата дома или да ги зголемуваат своите заштити од слабеење на доларот - што потенцијално може да предизвика егзодус од светската резервна валута.
„Се сомневаме дека овие акумулирани долари од страна на азиските извозници и институционални инвеститори се исклучително големи – можеби околу 2,5 трилиони долари – и претставуваат сериозен надолен ризик за доларот во однос на азиските валути“, напишаа Џен и Фреире.
Долгорочната привлечност на доларот е под закана, бидејќи напорите на Доналд Трамп да го преобликува глобалниот трговски поредок ги тераат инвеститорите повторно да ги преиспитаат своите стратегии засновани на американската „исклучителност“. Наглиот скок на тајванскиот долар во понеделникот само ги засили шпекулациите дека креаторите на политики во Азија можеби се подготвени да дозволат нивните валути да се зајакнат во однос на доларот, како дел од напорите за постигнување трговски договор со САД.
Индексот за доларот на „Блумберг“ падна за околу 8 отсто од февруарскиот врв, а сите азиски валути зајакнаа во однос на доларот во последниот месец.
Џен, познат по својата работа на теоријата за „доларската насмевка“ (dollar smile), претходно изјави дека околу трилион долари би можеле да се вратат во втората најголема економија во светот, бидејќи кинеските компании ги продаваат своите средства деноминирани во долари кога Федералните резерви (Фед) ќе ги намалат каматните стапки.
Овие мултитрилионски приливи може да се забрзаат и поради „голи долги доларски позиции“, кои се чести кај азиските земји со големи надворешни суфицити, напиша тој, алудирајќи на позиции што не се заштитени од флуктуации во вредноста на доларот. Некои од тие земји се Кина, Тајван, Малезија и Виетнам.
„Постои важен дисбаланс во светот што го прави доларот ранлив“, напиша Џен во најновиот извештај.
.webp){kind=icon}
